Taila Ao Calander ya tangsa tang agientsüla ; (ASLB must withdraw the faulty Ao Calendar immediately)

– Tsüknung Penzü, Dimapur.

Iba ocet yakta madoktsütetba atema nemjema bilemer:
Iba ocet ya taküm küm tetenzüklen adoktsütsü ta bilema rough copy bo zülur, ano fair copy yanglua revise sür computer nung ajener Tir Yimyim nung adoktsütsü ta file nung ayu. Tetsüngda mapang ni ita ka junga Nagaland nungi pilaa bendanglen yimti ka nung oa among. Aji meyipa arur külen ano, ozü sosem-tangsem asüama ataloka tasümang bener yimdaki aoba mapang atalok. Ano iba sülen jepdak mapa kar inyakba mapa agi jidanga iba ocet merenemtet süidaktsü.
Tang July ita tatemlen ni iba ocet Tir yimyim nung adokdakja, Ao Calander taila ya yaktasa ASLB-i agienang ta (withdraw süang) ta Aor public aser ASLB ayongzüka zülur.

1. Taküm 2018 ASLB-i Ao oshi raksaba küm:
Ao Senden Literature Board (ASLB)-i taküm 2018 nung Ao calander taila (faulty) ka adoka July agi ita 7 buba Ao kin mashileni anidagi. Calendar taie nung ita tenüng tai aser hapta ka nung anogo 7 tenüng tai. ASLB-i parnok sasa purapujia calendar tai yanglua Aor anisaba ya o bendangba court nung case (met-ko-ta-ma / metkotama) agütsüra, appeal süra, iba onük ya ‘Civil Case’ masü, ‘ Criminal Offence’ ta ajatsü tetemsü lir. Ibaibo nisung tepsetba (murder case) den kasasa. Kechiyong calendar tai agi Ao kin oshi tepseter aser Ao kenozülu (literature) tepseter.

2. Tai menaba nung Ao Senden-a densema lir:
Ao oshi tepsetba aser Ao kenozülu tepsetba tai nungji ASLB dang masü, ano Ao Senden-a densema lir. Kechiyong, ‘ASLB Zonizüng Ratet Sangdong’, Tir Yimyim osangkaket, March 9, 2018 nü adokba nung yamai zülua lir:- “Ao Senden temelaba agir iba calendar adoktsür” ta shia lir. Ao Senden-iang ASLB dangji, “Iba calendar ya tai-ar tamshi, shisa-a endokang” ta shia atendangtsü melen, kechiba ya adoktsü temelaba agütsü? Yangi Ao public-i aroka bilemdangtsü onük ka lir.

3. ASLB-i puraba ita 12 tenüng nung ita ka shitak lir:
ASLB-i puratetba ita 12 tenüng nung January = Aenjet ita ta asübaji shitak. Parnokibo ‘Aenjeti’ ta agüja lir. Saka aji ni ita ta dang amshir. Saka ya ASLB-i authority keta meteter züluba masü, ‘inong ta’ (by chance agi) shitak akümba lir. Aji angatettsü ni tatishitsü otsü ka agütsür.
Ao yim school ka nung tanur kati lesson kodanga makok. Idangji, ano Nagaland State mangudang, Naga Hills-ji Assam nung district ka dang aliba mapang liasü. Iba tensa nungji Naga Hills school ajak nung Assamese subject ka compulsory agia liasü. Künep tesayur-i lesson makoksang tanur dangji Assamese subject nung yamai asüngdang, “Najani tetezü Ao o nung kechi?” Tanursangi yakta dang “Memetet” ta langzü. Master-i ashi, “Tenepbo nai shitak shiogo, lesson kokogo” ta ashi. Idangji parnok class pur ajak menütep.
Iba otsü mesüka, taküm ASLB-i purapu jiba Ao calendar ya noklang nung noklang (100%) tai asütsüba melen 1% shitak, aser 99% tai ta ni mark agütsür. January = Aenjet ita ta asüba shitak.

4. Aor tsürabur-i jembiba küm ka nung ita 12 tenüng:
Teküpoklen, Aor tsürabur-i jembiba ita 12 tenüng, aser ano ASLB-i tanü asüng purapijia yangluba ita 12 tenüng ta ‘O takdang’ (chart) ka yanglua agütsür.

KÜM KA NUNG ITA 12 TENÜNG
Sl.no English Aor tsürabur-i jembiba tenüng Tanti ASLB-i puratetba
1 January – Aenjet ita  – Aenjeti
2 February – Alurongba ita – Tsüklai
3 March – Alutenba ita – Metsüremi
4 Apri – Jamija ita – Rongchii
5 May – Lumokpiba ita – Monupii
6 June – Amchi ita – Aami
7 July – Jisem ita – Chiteni
8 August – Aluruba ita – Luroi
9 September – Pensep ita – Rongjui
10 October – Zürenbong ita – Mongpoteni
11 November – Süchiba ita – Yimpoksüi
12 December – Aluchiba ita – Luchii

Temtsüng o (Footnote):
‘Ita’ ta züludang aser jembidang Aor shingaia zülujang ‘i’ dang züluba, amshiba mali. ‘Ita’ ta asüba ojang ya zülujang 3 dang asünungji ya lepsa-a ‘i’ dang amshiba nungji ojang tetezüji jangja-a mesayur. Anungji ASLB-i ita melen ‘i’ dang amshiba ya khenyongi tai.
April = Rongchii, September = Rongjui, June = Aami, August = Luroi ta ASLB-i purapijiba ya kechi kin oshi-ar ta Aor süngmangteper.
1. Aor tsürabur-i jembiba:
HAPTA KA NUNG ANOGO 7 TENÜNG ASER TETEZÜ
Sl. No. English – Ao Tenüng tetezü tamendakdak
1 Sunday – Zoni-nü – Day of the Sun
2 Monday – Lata-nü – Day of the Moon
3 Tuesday – Atunütsük-nü – Day of the Morning Star
4 Wednesday – Nüngjang-nü – Day of the Pole Star
5 Thursday – Bokojong-nü – Day of the Milky Way
6 Friday – Süküm-nü – Day of Taurus Constellation*
7 Saturday – Benja-nü – Day of Perfection

2. ASLB-i puratetba hapta ka nung anogo 7 tenüng:
1. Sunday = Amungnü
2. Monday = Tentonü
3. Tuesday = Sangtennü
4. Wednesday = Rasemnü
5. Thursday = Yangtepnü
6. Friday = Rogonü
7. Saturday = Küptoknü

Ao kin nübur anisaba tai tulu:
(Criminal case of misleading Ao people)
Aor küm ka nung ita 12 tenüng tai, aser hapta ka nung anogo 7 tenüng tai, item teyazü tenüng Tir Yimyim osang kaket nung adokdakja Ao kin nübur anisaba agi Aor lanur nem education tai agütsür.
Anungji, Indian Penal Code (IPC) tapet No. nung amendaker Aor concerned citizens telok kadi ASLB anema High Court mesüra tapet court ka nung case agütsütsü renemdagi. Saka court case magütsüdang tamasa tekümdangtsü warning agütsür.
Anungji iba Penzüba ocet ya Tir Yimyim nung adokba züngli-i taila (faulty) Ao calendar ya withdraw asütsü asoshi ASLB nem warning agütsür.
Yaktasa magiinra court case-ji asangsang agütsütsü. Ajisür court-i anendaktsüdangbo ASLB-i maksü achiba dang masü, senchi talang achiba court nem sen amount telemtet ka agütsütsüsa akümtsü. Anungji yaktasa ASLB-i iba calendar osang kaket nung madoktsüi agi-inang.
Ano, ASLB-i agi-in, magi-in ta kecha mashishitepi, argument magi-i, Ao calendar tai adokba ya anentsü Tir Yimyim kibur dang ajungshir.

Tatishitsü ka:
Alemli Mopungchuket yimdak aiür tajungtila Ediben intet. Mopungchuket yimdak dang masü, Ao lima ajak nung laji tetsür tobur tajungtila liasü. Tanü asüng ama ‘Beauty contest’ alemli-ji liasü asübo la-ji alima anung tobur tajungtila ta newspaper, TV, Radio ajanga sangdonger tila.
Saka lai lar yimdak tobur majung dang masü, aso-ajen-a tamajungtiba, asükerjang danger Jina-ba den-ang meimtep. Anungji la yimer nungi temoatsü munguteti ari-mashi yakta ki-yi moojungi asü.
Tanü Tir Yimyim osang kaket ya Aotsür aiür tajungtila ta züngshia Ediben den medemdanger. Saka ASLB-i Ao calendar taila (faulty) yangluba ita tenüng aser hapta ka nung anogo 7 tai, anogo shia paper kolak nung agüja adokba agi, aiür tajungla dak tejak nung sangpo yaksü (small pox) komo adokba komorak aliba agi tobur majung, yimdak asangur temi mesakloki aküm ama, TY akümtsü lenmang ana nung lir.
Anungji ASLB-i withdraw asüba matai, TY nung ibai adokba anentsü ajungshir.