Taila Ao Calendar anema züluba nung o metang den tangatetba kar

~   P. Wati Jamir, Tuli.

Tir Yimyim adok 280-281 tashi nung medemsor (contemporary) T. Penzü-i “ASLB purapujiba calendar tangsa agintsüla” ta zülubaji pa kija ola masü saka Aolisanger shirnokisa ASLB Calendar magizükteter, item ajak Tir Yimyim ama molungnen o shisemer.
Ao oshi ya Aori dang jembir masü, temeket kintem Sangtam, Phom, Konyak, Chang, dak alaka kin aika nüburtemi jembiba oshi lir. Anungji tang Aolisanger rongnung ASLB ajanga purapujiba Calendar ka adokba ajanga bangsentepa kazütsüsa atongtetba ya Aolisanger asoshi maksü lir, yamaji “maksü bener arutsür” ta ashibaji tim dang.
Osangkaket nung sangdonger kobi meli-i molung masüba, taiah ta bilemba o kinük aika nungi zülua osangkaket nung adoktsür, saka nübortem nemjemba ola mangashi aser mangu ama osangkaket kiburia asaa/metetsümonga anogoshi osangkaket nung amshiba angur. Ibai nübortem mezüngmeshiba maparen ama lir. Iba yagi balaka ano nübortem tejashitsü atur.
Anungji, tang koba yimjak nung ayimoktsür, ibai nübortem ola ta angatetdaktsüner.
Ibai joko issue (dispute) ka küma adok nungji angatetteptsüba dak alaka asenok tsüngda o ashishitepa kazütsüba mapang masü, saka angatetteptsü asoshi lenmang bushitsüla.
Sürabang shir lenniba nung inyaktsü? Aolisanger asoshi tematiba tashiji (supreme) Aolisanger inti senden (mongdang) lir aser iba senden nung President-i anir ketdangpurtem lir. Anungji joko telok ana küma adok nungji tiyungtsüi air kar (azünglar) nüngdak. Ibaji Ao Senden ketdangpurtemi shilem agitsüla.
Iba tangatetba nung Ao Senden ketdangpurtem dang tekaratiba nung Ao Senden Salang/Sabang nung nüngdakbapurtem ayongtena angatetteptsü mepishiba shisemer.
Ibai tatembang kati maru tashi Aor ita anogo dang ASLB-i purateta osangkaket nung amshia aruba ya nokdangtsüla.
Ibaji dang masü, school nung tazüngtsü kakettem aser Ao Osep nung item nüngjatem amshia matatsü sangdongtsüla.
Ibai interruption ka ama, saka rongdak nüngdak ta reprangtetba agi zülur. Medemsor T. Penzü dang teratet zülutsü mepishia kü o anena atar.