Taila kulikaket amshir ka apu

Dimapur, June 17 (TYO) : Nagaland Electrical Licensing Board ajanga Supervisor/Wireman License mapa atema interview ka agidang nisung kati taila kulikakettem amshiba putet.
June 16, 2016 nü Zonal Council Hall, Old MLA Hostel, Kohima nung interview agidang Sobir Hussain ta ser nisung kati taila kulikakettemji bener aru. Pa ya Purana Bazaar, Dimapur nung alir Mohammad Hussain’er jabaso ta jangjaogo, ta Sub-Divisional Police Officer (South) & PRO Kohima-i sangdong ka nung metetdaktsü.
Pa ket nung State Council for Vocational Training, Directorate of Employment & Craftsman Training, Kohima indang Trade Certificate, Provisional National Trade Certificate, Directorate of Employment & Craftsman Training, Kohima aser Principal, Industrial Training Institute, Mon ajanga agütsüba “To Whom It May Concern” certificate tem lir, ta Kohima Police sangdong nungsa ashi.
NELB Kohima nungi ketdangser kati North P.S Kohima nung FIR ka benokba nung ajemdaker bushisüngdanga aodang taila kulikakettem amshiba putet aser Sobir Hussain puogo. Iba dak sendakba nung ken o ka benokogo aser maneni bushisüngdang südar, ta Kohima Police-isa metetdaktsü.