Taila osang prokshirtem küm 3 tepuokdak ayutsü

New Delhi, March 2 (Agencies): WhatsApp nung osang tiyazü prokshirtem küm asem tashi tepuokdak ayutsü, ta tawa tasen tentetba Delhi Assembly Committee On Peace and Harmony-i metetdaktsüogo.
Delhi Legislative Assembly-i ‘Committee on Peace and Harmony’ ya tentet aser Hombarnü iba luden indang mezüng senden amen.
Tanü senden nung, tawa Delhi nung atalokba dak rangloker India kübok tesem balala nung kin o kin tsüngda mepetmesü adoka raratepba indang olemtep.
Iba luden nung mendenbubaji Aam Aadmi Party (AAP) MLA Saurabh Bhardwaj lir aser pai ashiba agi, parnoki taila osang anema campaign tulu ka tenzüktsü.
Ludeni phone number aser email-ID ka sayatsü aser iba ajanga nübortemi tesempatep adoktsüsa züluba aser taila osangtem anema osang agütsütsü akok. Parnokisa ozüng alema inyakba osang mezüng sangoktsürtem nem senpettem agütsütsü atema tebilemba aliba metetdaktsü.
“Na WhatsApp group ka mesüra chat group ka nung lir aser kari taitsü aketba osang ka agütsüra, iba osang anema ken o ka benokang. Nai benokba ken o ji FIR ama züluokra, nü nem Rs 10,000 senpet agütsütsü” ta AAP MLA Saurabh Bharadwaj-i ashi.
“Tawa Delhi nung mepetmesü adokdang tangar yarirtem aser taküm aika kümzükertem nem sempet agüsütsü. Onok asüng nikongtsütsü 3:00 ako nung maneni senden ka amentsü” ta paisa ashi.
Mepetmesü adokba mesüra telok balala tsüngda obang meputep adoka raraba ya Twitter, WhatsApp, Facebook aser tanga social media sabangtem ajanga osang tiyazü/taila aser tesempatep adoktsüsa osangtem prokshiba ajanga lir, ta Committee on Peace and Harmony-i kuli bushitetba osang ka metetdaktsü.
Taila osang aser tesempatep adoktsüsa osang prokshibaji ‘communal offence’ ka ama züngshitsü aser iba mapa inyakertem küm asem tashi tepuokdak ayutsü indang temerenshi agütsütsü, ta MLA Bharadwaj-isa ashi.
“Onoki fact-checking body ka den külemi inyaktsü aser ano ozüngren tsütsü teyari angutsü atema lawyers telok ka tentettsü. Maneni, technical teyari angutsü atema I-T experts telok ka tentettsü” ta paisa ashi.