Tain anepalutsü atema lokti & sorkar junga renema mali: Ansari

New Delhi, October 01, 2015: Brihostibar nü New Delhi nung HelpAge India-i ayongzükba ‘International Day of Older Persons’ sentong nung tatong Tir, Mohd. Hamid Ansari-i taintem nem sempet lemshia agütsüba noksa nung angur.

New Delhi, October 01 (Agencies): Brihostibar nü linük tatong Tir Hamid Ansari-i, taintem kanga züindar aser 2050 küm tashi nungbo parnok crore 32.2 ajungtsü, saka parnok anepalutsü atema lokti aser sorkar junga renema mali ama reprangteter, ta ashi.

HelpAge India-i ayongzükba ‘International Day of Older Persons’ sentong nung jembidang Ansari-i, “Asenok rongnung taintem kanga züindar aser parnok anepalutsü atema lokti aser sorkar junga renema mali ama reprangteter,” ta ashi.

Taintem junga lidaktsütsü asoshi linük Temzüng nung shia liaka item Acts junga inyaka mangur.

“Kanga züinba taintem nem teyari balaka agütsütsü maparen nung tashimait lir. India nung sorkar mozüki kar nungang geriatrics facility angur. Sorkari benokba National Programme for Healthcare of the Elderly scheme ama junga meinyaker,” ta tatong Tir Ansari-isa ashi.

2011 census nung arishi küm 60 dak tema tain crore 10.4 lir, aser ibaji linük nütsüng shilem 8.6 lir, aser 2050 küm tashi nungbo parnok crore 32.3 tashi küma linük nütsüng shilem 20 ajungtsü, ta HelpAge India aser United Nations Population Fund nati sangdong ka ajanga ashi.

Paisa ashiba agi, taintem rongnung security maliba tongtibang kuli rongnung kaji, yimtsüngtem nungi jila aser yimtitemi oa aliba ya lir.

“India lokti nung industrialization aser globalization ajanga yimtsüngtem nungi jila/yimtii oa litepba kanga bulur. Sobaliba yimya aser rejutem melenshiba ajanga generation tesentaktep tashi maitba kümdaktsür. Yimtsüngtem nung aluyimbaren nungi yimtitem nung industrial libaliro agi melenba aser yimtsüngtem nungi yimtitem aser bendanglen oa litepba ajanga lanurtemi tsürabur taintem kidang kija toktsür aotsüsa akümer,” ta tatong Tir-isa shi.

Tanü iba sentong nung Ansari-i HelpAge India-2104 osang sayaja liasü.