TAIT DAWIDTEM – (1SAM 17:32-51)

“Alima nung aliba dang nungi, nenok dak alibaji taoba”  (1Yn. 4:4).

Dawid Goliat matsüngdang! Tanur ka aso tulu jakdang! Sannüker ka rara nung mongin ka madang! Sauli Dawid nem agütsüba süoshi sobur Dawidi tejajaa mejajatet! (1Sam. 17:38-39). Dawid teti nungeri pa dang ain adok (t.28). Chubai pa asoa bilem (t.33). Tsükchiri pa atakatem (t.43). Saka Dawid pa tashi kaa liasü aser Kibuba nung imla (t.45). Pai Goliat azüzük, “Na kü dangi noklang nok, nü aser lijak den arur. Saka Tematiba Kibur, Israel tsükchir Tsüngrem, shiba nai menentsür, pa tenüng nung arur”(t.45).

Kodang asenoki missionary mapa inyaki odir asenoki tashi tulutem ajurutsü akok, saka Science, techonology aser tawa-tanü yangluba hadiri asenok atentendaktsütsü menüngdak. Nisung ka den Tsüngrem denra teperi! Iba den tokteptsü kasa tashi mali. Tanü asenoki Goliat tsübutsü mali.

Asenoki tasü aittsü tenüngdaktsü. Tasü maiti mokokdaktsütsüla. Ishiba süaka tetezü keta ishiba lir. Telok tilaba nem yimliji agütsütsü nangzüka lir (Lk. 12:32). Benjamin Fernadoi tasü aittsü o ashi: “Arogo tepsatsübaji atom tepsaba mesüka lir: Tsüngrem tashi tepsatsü aser sayatenya aika inyaker!”

Dawidi jembiba o ji Saul chuba army asoshi mangatetba oshi ka ama liasü! Ibaji atangji! Pai aji arem nung pa kija Tsüngrem den alidang angazük. Kibubai dang Dawid dang pa mechi aser lung yokba shikep koda amshitsü sayu (1Sam. 17:40). Pai lung tesüsü pungu aben saka pai ka dang amshi. Pezüji pai tarutsü Goliat asoshi ayu! Alinük pungu asoshi Yisu azü tokshiba nung tashi teperi lir. Asenoki tsübua melili. Tsüngremi asenok nem chuba punguji agütsütsü (Yihusua 10:24,25).

Tetsübu jagi asenok sayutsüngiba mapa nung dang leni mao kümdaktsür. Pa shibai asenok alima tatem tashi aotsü mela pa asenok den alima tatem tashi atentsü nangzük (Mt. 28:19,20). Tsüngremer mi nisungi yangluba rishikangshi agi remseptsü makok. Tamangi alima akoker, aji asenoki metet.

Oba Tsüngrem. Nai nungloktsüba metsübui inyaktsü onok tamang ulujang. Amen.