Taitsüba aser Angatetdaktsüba

“Tsüngremi mulungba amato jashitaktsübai, tanaben mesasatsüsa, tekümtet asoshi temulung meyipdaktsür” (2. Kor. 7:10)

Taitsüba aser kongshia aitba tatishitsü tajungtibaji Iskariot Yihuda aser Simon Peter lir. Aji saka satani Yihuda ashioktsü. Pai Yisu ashioktsü (Lk. 22:3-5). Kodang Yihudai pai inyakba bilemtet, pai kanga jashi aser pa sasa soseta asü. Pa soseta asübaji satani aitsüba asü Tsüngremi kongshiba ? Ibai taitsüba, kechiaser pai pa sasa tepset. Taitsüba jagi tasüba dangi anir; kongshia jashitaktsüba jagi temulung meyipba aser taküm dangi anir.

Peteria Yisu menangzük. Nütsüngtem rongnung jembiba ama, ibai asüküm nungi tenzüker; shiba tuluba asütsü. (Lk. 22:24-30). Asüküm ajanga Peteri satan nem’ tetsüng ajemetdak ka agütsü (t. 31). Saka Yisui Peter asoshi sarasademtsü (t.32) Peteri Yisu den asütsü nangzük. Saka Yisui pai pa ashioktsütsü ta ashi, aser aji atalok (Lk. 22:33,34). Peteri angateta aru aser jashi aser temulung meyip (Yn. 21:15-17). Kodang tejashi nung Tsüngrem nungi piladir satani na aitsür.

Ibaji nokdangang. Saka kodang ne tejashi jagi Khrista den ajurutepdaktsür aser ne tai nangzüker aji Tanela ajanga inyakba. Khristai asenok tatidang ajak nung yarir (1 Yn. 2:1). Kibuba, Tebu matsüngdang onok aitsüba ajak nung nai kümzükba asoshi pelar.