Taiwan, China nung Super typhoon arutsü sangdongogo

Beijing, September 27 (Agencies): Pacific aser Indian Ocean len nungi aruba cyclone, ‘Super Typhoon,’ China anülulentip aliba Taiwan leni joko tan agi 21 benbuba arutsü, ta ketdangsertemi Deobar nü sangdongogo.
Dujuan ta tenüng agütsür aliba yipru tulu yagi ghonda nung kilometre 15 nungi 20 tashi kara jajar. Yipru tesashi ya joko Taiwan anüdoklentip tsütsü aliba tzüküm tonga arudar aser Hombar nü ali atongtsü ta takzüktetogo. Yipru ya ali kodang tongtir second ka nung mopung metre 48 nungi 50 tashi kara aontsü, ta Xinhua news agency ajanga metetdaktsüogo.
Iba sülen kasa yipru yagi China nungsa Fujian province nunga Mongolbar nü kongshitsü, koba ajanga mopung 45-90 knots (Beaufort scale nung 7 nungi 10) aontsü aser tzünglu kanga sashia aludaktsütsü, ta ketdangsertemisa ashi.
Iba yipru yagisa Zhejiang, Guangdong, Jiangxi, Jiangsu aser Anhui province tem nunga kongshitsü.
Yipru ya tonga arudang tzüküm anasabo tzüsem metre 4 nungi 7 tashi ajungketa lendong ataloktsü akok, ta parnokisa metetdaktsüogo.