Taiwan gari lendong nung nisung 32 asü

February 13, 2017 nü China anüolentip tsütsü anüdoklen aliba Taipei, Taiwan nung bus gari lendong atalokba tesem nung tekümzükertemi yariba noksa nung angur. Iba lendong nung  nisung 32 asü. Küm 30 tsüngda Taiwan nung atalokba gari lendong rongnung ibai tulutiba lir ta Taiwan’s Central News Agency ajanga metetdaktsür.

Taipei, February 14 (Agencies) : Hombar aonung raliwalirtem mena aliba Taiwan bus gari ka tsükokba lendong nung nisung 32 süogo, ta linük fire agency-i metetdaktsü.
Tesem nung aliba osangbenertemi ashiba agi, iba bus gari nung raliwalirtem central Taichung nung aliba farm ka reprangi orr arurba mapang Taipei anüdoklen tsütsü gari lenmang menüngchir tsükogo.
Linük fire agency-i, iba lendong nung nisung 32 asü aser tang ano nisung 13 mozü kidang yaridar. Tang yirur alirtemji timba ka tasü taküm tsüngda lir, ta ashi.
“Bus gari nung mena alir ajakji Taiwan nunger nisung tain dang liasü,” ta Taipei City fire department nungi Chen Chih-min-i ashi.
Iba bus gari ya nüburtem anir tesem tobur ajung repranga anir jajaba gari ka liasü, ta paisa ashi.
Nisung 45 mena aliba bus ya lenmang tezülen oa anünglen shia tsükoka lir.
Osang ajanga ashiba agi, iba bus tekolaklen tulu ka shiboka lir aser iba tapok nung jagi nisung karbo merepteta adok. Iba lendong atalokba tesem nung tang tekümzükertem nisung 100 shii oa yaritepdar.
Tang police-i iba bus gariji kanga kara aoba agi lendong ajuru asü masüar bushisüngdangdar, ta tesem nung aliba osangbenertemi ashi.
Lendong nung asürtemji sü temesüng agi meyibanger gari tsükokba tesem nungji yua lir, ta osangbenertemisa ashi.
Republic of China nung lenir Lin Chuan-i gari lendong nung asürtem den asüku lemsatep aser yirur alirtem tajungtiba nung anepalutsü asoshi health ministry nem tetuyuba agütsüogo, ta cabinet sangdong ka ajanga metetdaktsü.
Osang ajanga ashiba agi iba bus gari ya küm 19 tain aser Taiwan nung raliwalirtem anishiba agency ka meyong lir.