Taiwan-i ‘Dujuan’ yipru aruba agi nisungtem jena aor

Taipei, Taiwan nung Dujuan yipru mopung aonba ajanga nisungtemi amba anüshi apdoktsüba angur.

Taipei, September 28 (Agencies): Tzüyim nungi aruba `Super typhoon` Dujuan Taiwan asetkong anasa aruba ajanga nüburtemi iba tesem toktsür aor.

Hombar nikongdang nungi Taiwan nung tzünglu tesashi alur aser mopung kanga sashia aoner. Tang tashi nung takzükteta aliba agi Homdbar aonung 11:00 akok shi nung iba yipru tesashi yagi ali arua atongtsü.

Anüdoklentip tsütsübo joko Hombar anüngdang nung tzüsem kanga sashia arur aser ibaji ajanga angopur rongtem ajak tzükemi arutsü metetdakja liasü.

Tzü-mopungtendanger mongintemi ashiba agi, iba super typhoon aruba mapang ghonda nung mopung kilometre 227 kara aontsü.

“Asetkong nung alir ajak iba yipru asoshi kanga renemshia atatsüla,” ta Taiwan Central Weather Bureau nung otongdari ashi.

Taiwan nung aliba Green Island aser Orchid Island nung kanga nüngtugu tourist parnok 3,000 shi yipru nungi kümzüktsü meji (evacuate) Deobar nü tesem nungi otaktsüogo.

Hombar nüa ano nisung 4,000 shi tesem nung aeinshidaktsüogo.

Tang Taiwan nung Mid-Autumn Festival amung tiyalong nung iba yipru yagihopta piyong jangjungtsü.

Hombar nung Taipei nung US nungi rock kentener telok, Bon Jovi concert ka agütsütsü aliba dena tiogo aser iba den küleni international tayimtsü 169 aser domestic tayimtsü 59 tashi tiogo. Ano train tema anogo tom nungibo mejajatsü sangdongogo.