Taiwan-i tayimtsü nung tanur asoba atema ken o benok

Taipei, October 20 (Agencies): Taipei nungi Los Angeles-i aoba China Airlines tayimtsü ka nung tetsür ka tanur asoba dak sentakba nung Taiwan nung ken o ka benoka, nusotsü atema airlines sen tali laludaktsüba monokdaktsütsü, ta osang ka ajanga ashi.

Minister of Transport & Communications Chen Jian-yu-i, airlines-i nusodang bilema maliba sen entokba ajak la nem menokdaktsütsü, ta Mongolbar nü EFE osang ajanga metetdaktsü.

Tayimtsü mapusodang ozüngi melaba ama lai la mashisa kümer hopta 36buba-a ta mashi aser tayimtsü tudak nung tanur asoba ajanga mozü kidang tanur o tetsü na nem tekaratiba nung medical teyari agütsütsü meji lenmang melenshir Anchorage, Alaska nung lua anen.

Tayimtsü lenmang melenshiba ajanga sen dollar 33,000 akoksaogo, ta airlines sangdong ka ajanga metetdaktsü.

US nung asoba tanur ajak America senso agütsür anungji lai asoba tanura US senso ka südaktsütsü asoshi tanur yangji asotsü atema US-i aoba mapang tayimtsü nung aso.

Tetsürlajibo Taiwan-i meyipa aruogo ajisüaka tanurjibo lar medemtsür kati US nung anepaludar.