Taiwan kaketshirtemi China tesayuba anema longkak aiter

Taipei, July 22 (Agencies): Taiwan kaketshir noklang ishikati Taiwan’er education ministry ki kimalen tanü kanga sashia longkak aitogo.

China den sentakba tesayuba agütsütsü nükjidong nung par tesayuyim melenshitsü renemba sentong agientsü takhangba benoka parnoki longkak aita liasü.

Taiwan’er shishaluyim amokbangtsü asoshi China-i meranger ta temulung malemba yong Taiwan kaketshirtemi aniba longkak aiter telok tulu kati yaküm, 2014 küma China den agitsü renemba shishilembatsü tezüngzüktep magitsü takhangba benoka par parliament ki kimalen hopta asem tashi longkak aita amongba osang bushiteta lir.

“Taiwan kaketshirtem nem China den sentakba tesayuba agütsütsü meranger,” ta shia, tanü longkak aitertemi par school kakettem ministry ki kimalen nangdena yur kanga sashia longkak aittep.

Nüburtem den nungdakba osangtsüsang magi par high school tesayuyim taküm September ita nungi tenzüka tasen küma melenshitsü sentong sorkari benoka lir ta tanü longkak aitertemi metetdaktsü.

“Ozü Taiwan kaketshirtem temulungjang nung China wangshiba den sentakba shisatsü aser tangatetba inoktsütsü nükjidong nung kaket aser tesayuyim tasen benoktsü maparen tenzüka lir saka onoki iba maparenji khen yongi magizüker,” ta kaketshir lenir, arishi küm 18 tain Chu Chen-i kanga jashia ashi.

Taiwan-i 1949 nungi tenzüka peisasa yimsüsüa arur saka Taiwan asetkong ya tangasa par yimli kübok densema lir ta China-i züngshir.