Taiwan nung azüshi aser danüshi nokdanger

Taipei, April 12 (Agencies): Taiwan nung azüshi aser danüshi achiba nokdanger ta sorkari Bodbarnü metetdaktsüogo. Taochi melii shirurutem tepsetba onük aika adokba sülen sorkari iba telemtetba agiogo.
Parliament nung azüshi aser danüshi achiba, aliba mesüra abenba nokdangtsü atema ozüng ka yanglu aser iba nung aibelenertem dang Tw$250,000 ($8,170) tashi senchi achitsü latetogo.
Iba ozüng nungsa, shiruru tepsetertem mesüra tashiyim amshirtem, talangba agi küm ana tashi tepuokdak ayutsü aser Tw$2 million senchi achitsü latetogo.
“Iba ozüng ajanga Taiwan ya shiruru meimba linük ka lir ta sayur” ta MP Wang Yu-min-i osangbener dang ashi. Pai iba ozüng yanglutsü atema mezüng Parliament nung tebilemba benoka liasü.
Tanga Asia linüktem nung ama, Taiwan nunga azüshi kanga sapua chia aru saka tanü-asüng iba ya kanga ajema kümogo.
Tesüiba küm ishika tsüngda azüshi ayokba dokantem shibangtsüogo aser loktiliba nung shiruru dak taochi melii mapa inyakbatem indang ken o aika adok.
Yaküm Taiwan nung sepai asemi azük ka tepsetba video ka prokshiba sülen Army-i yimjak nung tatok meshitsüsa tensa ka ajurua liasü.