Taiwan nung dengue agi shirang 26,660 kümogo

China anülulen aliba Taiwan, Kaohsiung tesem nung dengue tashidak prokshia aoba nungi kümzükba mapa nung inyakertemi merila mozü arükba kol tendangba noksa nung angur.

 Taipei, October 23 (Agencies): Taiwan nung ano dengue agi shiranger 307 putetsema taküm May ita nungi tang tashi nung dengue agi shiranger ajak agi nisung 26,660 kümogo, ta Hokolbar nü Centres for Disease Control (CDC) ajanga metetdaktsü.

Iba shirang ya Kaohsiung aser Tainan yimtitem nung timba lir. Yimti ana nung dengue agi shiranger 185 aser 119 putetsemogo, ta Taiwan News-i metetdaktsü.

Taküm iba shirang yagi Taiwan nung nisung 122 tashi süogo, ta CDC-i ashi. Parnokisa ashiba agi dengue agi shiranger nisung 24,521 tashi taneptsü nguogo.

Dengue ya tesem tatsük nung timba adoker aser menatepba tashidak ka lir koba merila ajanga prokshir.

Dengue agi shirangba mapang tekolak angotsü, temang arongtsü, shi tetsü o teret teloktep angotsü aser teküp nung komojang anaktettsü.

Dengue agi shiranger karbo ‘hemorrhagic dengue fever’ akümer aser ibaji taküm asoshi kanga lendong lir.