Taiwan nung menoknok anok; 11 shi asü, 100 ishika yiru

Taiwan southwest tsütsü tzüyimkümlen, Tainan yimti nung menoknok tesashi anokba ajanga jireptsü ki nung alirtem kümzüka anitettsü asoshi rescue ketdangsertemi mapa inyakba noksa nung angur. (Tainan, February 06)

Tainan, February 06 (Agencies): Taiwan linük nung menoknok lendong tesashi ka tanep, Honibar nü anepongi atalokba sülen nisung 11 shi asüba, nisung 100 ishika yiruba aser nisung 5 tashi monguteti aliba osang ka Taiwan sorkar ketdangsertemi metetdaktsüogo.
Tan menoknok tiyongtsüji nisung million 2 shi alidak, Tainan yimti nungi southeast tsütsüleni kilometer 43 shi pilar ali telungleni kilometer 23 shi irr aliba osang bushitetogo ta US Geological Survey-ia metetdaktsü.
Tanep 4:00 ako meta anokba magnitude 6.2 tesashi menoknok lendong nung asür rong nung anogo 10 tain tetsür kinü chanu ka densemba osanga jangjaogo.
“Tan menoknok anokba ajanga takdang 17 tashi atongtepa asüba ki 2 densema, Tainan yimti tesem balala nung nisung aliba ki aika jirepba osang bushitetogo,” ta fire brigade ketdangser kati metetdaktsü.
Paisa ashiba agi rescue ketdangsertemi hydraulic tashi amshiba apu aser osettsüset taret ajungshiba crane amshia tan lendong nung densemer nisung 220 dak tema kümzüka anitetba osang tang tashi nung jangjaogo.
“Tan lendong tesashitibaji takdang 17 tashi atongtepa asüba ki, Golden Dragon Building nung atalokba osang jangjaogo. Apartment 96 tashi densemba Golden Dragon Building nung nisung 256 tashi lia tan lendongji atalok,” ta Tainan yimti mayor, William Lai-ia metetdaktsü.
“Tan lendong nung yirur nisung 115 tashi mozüki anir aoba sülen parnok tang taneptsü bushia lir,” ta Tainan fire ketdangsertemi shisem.