Taiwan nung Typhoon yipru lendong atalok; 6 asü, 101 shi yiru

Taiwan kübok Taipei nung Typhoon Soudelor ta ajaba yipru mupong kanga sashia aonba ajanga apdokba ki kilem nung alemba injongtem yimti nung tzüka aliba noksa nung angur. (Taipei, August 08)

Taipei, August 08 (Agencies): Typhoon Soudelor ta ajaba yipru lendong Taiwan nung tanü Honibar nü kanga sashia aonba sülen China tsütsüleni aoba osang jangjaogo ta sorkar ketdangser kati metetdaktsü.
Soudelor yipru mupongi süngdong, traffic light aser light tongshi laokdakja lendong atalokdaktsüba den külemi, nisung 6 tashi tepsetba osang tang tashi nung jangjaogo ta pai metetdaktsü.
“Tanü yipru lendong atalokba sülen nisung 4 shi samar bushiba aser nisung 101 shi yiruba osanga tang tashi nung jangjaogo,” ta pai ashi.
Ano, yipru mupongi light inzü tokdangtsüba yong kibong million 3 dak temai tang light tashi monguteti aliba den külemi, linük telung nung yimzüba tayimtsü 279 aser bendangleni aoba tayimtsü 37 tashi mesenzüi oda anena alitsüsa akümba osanga jangjaogo.
“Soudelor yipruji tanep 4:40 ako meta nungi tenzüka Taiwan anüdoklen aontsü tenzük aser tanü anüngdang tashi nungbo yipruji ghonda nung kilometer 162 kara jajatsü tashi nung aonba osang bushitetogo,” ta Taiwan’er Central Weather Bureau (CWB)-i osang jangjashitsü.
Ajisüaka, tanü nikongtsütsü tashi nungbo yipru tashiji tajemba küma ghonda nung kilometer 144 kara jajatsü tashi nung ona Taiwan northwest tsütsülen nungi China tsütsüleni ao ta CWB-i ashi.
Yipru mupong aonba tembangaka, par linük nung mupong tesashi aonba den külemi, tzünglua maneni arutsü osang bushiteta lir ta par teloki metetdaktsü.
Ano külen, Soudelor yipru lendong nungi kümzüktsü terenemshiba agia, China’er ketdangsertemi par linük southeast tsütsülen alir nisung 163,000 dak tema anizüka tanga tesemi anir aoba den külemi, yipru mupong aontsü ta bushitetba tzüyimküm nunga rongtem manendaktsüi tzüyimleni meyipa yokba osang angazükogo.
Nungdakba teyari agütsütsü maparen inyakdaktsütsü nükjidong nung China southeast tsütsü Fujian province nung mitkar aser police züngsem 7000 shi sorkari tang yoka lir.