Taoyuan City, May 20 (Agencies): Taiwan kübok Taoyuan City nung ayonga asayaba Taiwan Open Athletics Championships anogo 2 buba aser tatembangba nung Dutee Chand-i tetsür 200m tetoktepba gold medal India asoshi tanü, Hokolbar nü agizüktsüogo.
Dutee-i tanü gold medal agizükbaji densema, India’er athletics asayartemi tan asayamong nung gold 4, silver 3 aser bronze 2 densema, ajak agi medal 9 tashi agizükba osang ka Athletics Federation of India (AFI)-i metetdaktsüogo.
Yashi, Brehostibar nüa tetsür 100m gold agizükla, Dutee-i tanü mapang 23.52 second nung alizüng mezüng tonga gold medal-ji agizük.
La sülen anidaka, Srabani Nanda-i mapang 23.55 second nung alizüng tonga silver aser Jyothi HM-i mapang 23.92 second nung alizüng tonga bronze agizüka liasü.
Külem sensopur, Kripal Singh-ia discus metre 58.20 tonga merepdoka gold agizük aser pa sülen anidaka, Arjun-i silver aser Taiwan nunger Ci-Yun Li-i bronze agizük.
Tebur shot put tetoktepba nung Korea nunger IL Woo Jung-i 18.12m tashi ondoka gold agizük aser India nunger Om Prakash Karhana-i 17.85m tashi ondoka silver agizük.
Külem sensopur, Arivuselvam-ia 15.62m tonga ajokba sülen tebur triple jump tetoktepba nung bronze medal agizükba osang jangjaogo.
You must be logged in to post a comment Login