Taiwan opposition lenir, Tsai-i Tir election kokogo

Taiwan opposition lenir, Tsai-i Tir election kokogo

Taiwan nung tentetba Democratic Progressive Party (DPP) Chairperson & presidential candidate, Tsai Ing-wen (Ajichilen)-i Taiwan kübok New Taipei nung lar vote agüja Tir election nung shilem agiba noksa ka yangi angur. (New Taipei, January 16)

Taipei, January 16 (Agencies): Taiwan opposition lenila, Tsai Ing-wen-i aniba Democratic Progressive Party (DPP) yimtenren teloki Tir election akokba osang ka tanü Honibar nü sangdongogo.
DPP teloki China pusemba Nationalist yimtenren telok den jenjang tajung ngua tan election nung takok ngua Taiwan sorkar tasenba tentetsü temeten anguba yong par linük aser China na tsüngda tesendaktep mejungi akümtsü akok.
“Ozü Nationalist teloki tan election nung tamakok anguba ajanga ni, Eric Chu-i Taiwan nübur ajunga indang pungmang samatsüogo,” ta Nationalist telok nungi candidate ama Tir election nung toktepa shilem agisang, Eric Chu-i sangokja par yimtenren telok indang mendenbuba menden toktsütsü lemtetba osang ka tanü metetdaktsüogo.
Tsai-i tan election nung takok anguba ajanga lai Asia ajunga nung mapa tasaktiba aser lendong aketba lenisütsü menden benoktsü jenjang angur lir.
Lai Tir menden benokba sülen, lar Taiwan den shishilembaba linük tulutiba, China aser Taiwan pusemba linük, United States naprongla den tesendaktep junga ayutsü khuret tulu benoktsü.
Lar Taiwan linük indang peisasa pei madak yimsüsü asütsü temeten angutsü merangra, iba jagi China jashidakja toaba küm 8 nungi tenzüka yangluba tesendaktep mejungi akümtsü.
Ano, taoba Taiwan Tir, Ma Ying-jeou aser pa jakdang Taiwan lenisütsü menden abenertemi China den tesendaktep junga meyangluteti süidaktsüba yong Tsai-i tebilemtsü khuret tulu benoktsüsa tang jenjang ajurua lir.
Taiwan kaketshirtemi 2014 küm Taiwan parliament kimalen hopta ishika monga China anema longkak aitba sülen Taiwan nung DPP telok pusemer nisung jenti kümogo.

You must be logged in to post a comment Login