Taiwan Tatong Tir, Chen-i Vatican semdangtsü

Taipei, August 24 (Agencies): Taiwan Tatong Tir, Chen Chien-jen-i taruba September ita 4 nü Vatican semdangtsü sentong renemba osang ka par Deputy Foreign Minister, Wu Chih-chung-i tanü, Bodbar nü metetdaktsüogo.
Vatican-i alima ajunga nung nütsüng yongsük timtiba alir linük, China den tanaben sentakteptshitsü alizüng yua lir saka Chen-i tan Vatican semdangba ajanga China jashidaktsütsü akok.
Asür Mother Teresa saint kümdaktsütsü sentong nung Chen-i par Tir, Tsai Ing-wen tenüng nung shilem agitsü sentong renemer lir.
China-i Taiwan madak yimsü asütsü tashi benokba aser Tsai-i aniba Democratic Progressive Party (DPP) telok dak temulung malemba osang bushiteta lir.
Ajisüaka, Chen DPP-i aniba sorkar yimsüsür ka süaka, pa DPP telok nungbo züngsema mali.
Vatican ya China den tesendaktep junga yua maliba West tentet kija lir aser Vatican-i Taiwan nung tentetba Republic of China den tesendaktep junga ayuba ajanga China jashidakja lir.