Taiwan Tir-i democracy kümzüka ayutsü teyari meshi

Taipei, Aenjeti/January 5 (Agencies): China-i asentenshir amokmeren tenzükba tensa ka nung Taiwan tir Tsai Ing-wen-i Honibarnü alima linüktem dang Taiwan democracy aser parnok libaliro kümzüka ayutsü atema nungita yaritsü mepeshiogo.
China Tir Xi Jinping-i par linük nung armed force tem dang tashi itshitsü aser tongbangi aotsü atem renema alitsü asoshi parnoki akokba tashi inyaktsü atema ashiba sülen anogo ka lir Tsai-i iba temepeshiba agüja liasü.
“Alima nung linük balalai iba onük ya süoki ia agia ola adoka onok yaritsü onoki imlar,” ta Tsai-i osang benertem dang ashi.
“Alima lokti-i lendong nung aliba democratic linük ka pumesemra okok sülen koba linük asütsü ta onoki asüngdangtsü akok,” ta Tsai-i ashi.
Taiwan indang ken o ya China nunger ken o tongtibangtiba rongnung ka lir aser Beijing-i iba linük ya parnok meyong ta züngshir. Pro-independence Democratic Progressive Party nungi Tsai 2016 küm Tir akümba sülen nungi Xi-i parnok kanga nongshia arudar.
Tir Xi-i Bodhbarnü ashiba agi, parnoki tashiyim agi Taiwan parnok küboki aitdaktsütsü tashi lir saka iba asetkong den yimjung nung dang ken o ajak bentetner.
Iba nung telangzüba agüja Tsai-i, par linüki ‘linük ka aser inyakyim ana’ ta asüba inyakyim China den yimden yimsüsüba tsütsü renema aliba magizüktsü, ta ashiba den sorkar ana tsüngda o lemtepba akatsüla ta ashi.
US tir Donald Trump-i Asia Reassurance Initiative Act ozüng küma yangluba nung sign süa US-i iba asetkong security tsütsü tali bendanga agüja inyakba jangjashitsüba sülen Xi-i iba o jembia liasü.
Tsai-i Honibarnü China dang Taiwan nunger tebilemba angatettsü merangtsü atema mepeshi aser iba amala yimden yimsüsüba tsütsü amokmeren ajanga tesendaktep tamajungba kümdaktsütsü ta ashi.
1949 küm rara sülen linük ana ya pila saka China nungeri tang tashi Taiwan ya parnok litsü kübok lir ama züngshir.