Taiwan Tir, Ma o Xi nati otsüsütsüsa senden amentsü

Beijing, November 04 (Agencies): China Tir, Xi Jinping aser Taiwan Tir, Ma Ying-jeou nati Singapore nung ajurutepa otsüsütsüsa tan Honibar nü senden amentsü sentong renemogo.
Taiwan-i general election sentong agitsü hopta ishika anünga alidang Ma-i Xi den tan senden amentsü sentong renemer lir.
Lenir anati tan senden amentsü sentong renemba ya China o Taiwan lenirtemi 1949 sülen tan mezüngüsa tsüngdong ajurutepa senden amentsü sentong renemer lir.
Ajisüaka, par lenisangi Xi den senden amentsüji memulunger ta metetdakja, opposition telok yimsüsürtemi ayonger külen Taiwan yimtiba, Taipei nung nüburtemi tanü kanga sashia longkak aitogo.
“Ma-i Taiwan Tir menden tanabenren benokba jakdang pai China lenirtem den majuruteptsü aser China den tanaben lokteptsü onük mejembitsü nangzük,” ta shia, tanü longkak aitertemi Ma lenisüba menden nungi anentsü takhangba benoka liasü.
China-i democracy yimsüsütsü yimya benshiba Taiwan linük ya tangasa par yimli kübok aiter ta züngshia, Taiwan tanaben par yimsüsütsü tashi kübok anioktsü meranger saka Taiwan nübur rong nung Taiwan tanaben China kübok aitsü asoshi pusemer kanga dang ajema lir.
Par lenisang, Ma-i China Tir, Xi den ajurutepa senden amentsü osang angazükba sülen kanga dang aoksaba olen ka Taiwan Tir election nung candidate ka ama tokteptsü renemla, Democratic Progressive Party yimtenren telok nung mendenbula, Tsai Ing-wen-ia metetdaktsüogo.
“Ozü Taiwan linük jenjang tajungba kümdaktsütsü nükjidong nung China lenisang, Xi den senden amentsü sentong renembaji kanga junger. Ajisüaka, kasa senden amentsü sentong renemba osang nüburtem dang ajungbena metetdaktsüba ajanga Taiwan’er democracy inyakyim nem timtem bener arutsür,” ta lai ashi.
Ano külen, par lenisang, Ma-i China Tir, Xi den senden mena par linük ana tsüngda tesendaktep tajungba küma yanglushitsü sentong lir saka lenir anati tongti tezüngzüktep ka danga zülutepa agitsü sentongbo maliba olen ka Ma’er otongdar-i tanü osang jangjashitsüogo.
Ma-i Taiwan lenisütsü menden benokba sülen China den shishilembatsü tezüngzüktep 23 tashi agia par linük ana tsüngda tang tesendaktep tajungba akümba osang bushiteta lir.