Taiwan Tir, Tsai-i Latin America bushia ogo

Taiwan Tir, Tsai Ing-wen-i Latin America semdangba jakdang lar Taiwan yimtiba, Taipei nung agiba mitkar sentong ka nung shilem agiba noksa ka yangi angur. (Taipei, June 24)

 Taipei, June 24 (Agencies): Taiwan Tir, Tsai Ing-wen-i Latin America nung tentetba linük ana semdangtsü asoshi tanü, Hokolbar nü apusoa ogo.

Lai anogo 9 agia Panama aser Paraguay linük na semdangba jakdang Tsai-i United States nung anenzüktsü sentong lir.

Panama aser Paraguay nati par linük semdangtsü jaokba sülen Tsai-i tan par linük ana semdangba ya lai mezüngbuba tetsür Taiwan Tir kümer ita ka shi nung tan bendang linük semdangtsü tenzüker lir.

Tsai-i Panama tonga aoba sülen taoba mapang nungi tuluba küma yanglushiba Panama Canal lapokba sentong nung tan Deobar nü shilem agitsü sentong renema lir.

Kasa sentong nung alima linük 70 shi nungi lenir lenir aser tongti nisungtemi shilem agitsü renemba osang angazükogo.

Ajisüaka, China aser Taiwan na tsüngda tensa tang mejungi lir aser Taiwan par yimli kübok aiter ta züngshir China linüki Taiwan den tesendaktep junga yanglua aliba alima linük 22 rong nungi linük karbo par China pusemdaktsütsüsa mapa inyaka Tir Tsai nem tebilemtsü khuret agütsüba osang bushiteta lir.

China aser Taiwan na tsüngda tesendaktep mejungi mapang talang ka aruba sülen taoba Taiwan Tir, Ma Ying-jeou-i 2008 küm nungi tenzüka Tir menden benok aser iba mapang nungi tenzüka par linük ana tsüngda tesendaktep tajungba aküm.

Ajisüaka, Tiawan-i peisasa pei madak yimsü asütsü temten bena lir ta tangatetba alir Tsai-i Tir menden benokba sülen par linük ana tsüngda tesendaktep tanaben mejungi akümtsü tenzükba osang bushitetogo.

Aji oda, Tsai-i tan Panama Canal lapokba sentong nung shilem agiba ajanga lai US lenirtem den tsüngdong ajurutepa lar linüki ajurushiba timtem lemsateptsü maongka angutsü.

US den tesendaktep junga yangluba aliba China linüki Taiwan aser Washington na tsüngda tesendaktep junga meyangludaktsüi nokdangba osanga bushiteta lir.

Tsai-i Panama Tir, Juan Carlos Varela den ajurutepa par linük ana tsüngda aluyimtsü, kaketshisatsü bushitsü aser technology den sentakba tezüngzüktep ishika agitsü sentong renema lir.

Ano, Paraguay nunga lai Tir Horacio Cartes den ajurutepba den külemi, Paraguay yimsüsürtem den senden amentsü sentong renemba osang angazükogo.