Taiwan yipru China nung tatemsa süshi

China, August 9, 2015: Fuzhou, Fujian province, China nung ‘Soudelor’ yipru aruba sülen gari ka tzü atsünga aliba tesem nungi nungtetba noksa nung angur. Iba yipru ajanga tang tashi nung nisung 9 süogo, tayimtsü service aika thinenogo aser nisung 163,000 tashi pei aliba tesem toktsür yipru dang nungi jenogo.

Beijing, August 9 (Agencies): Taiwan nungeri ‘Typhoon Soudelor’ ta ajaba yipru ajanga tatemsa Deobar nü China nung anentsüh aludakja liasü. Iba yipru yagi Taiwan nung nisung trok taküm lalutsüogo aser noklang aika yirutsüba den külemi ki million aika nung electricity mali kümdaktsüogo.
China anüolentip aliba Fujian province nung tzünglu kanga sashia aruba ajanga gari lenmang nung tzü metre 2 (feet trok) metsüngbanga atu, ta Xinhua news agency nung ketdangsertemi metetdaktsü. Tang tashi nung iba yipru yagi China nung tajemba agi nisung 9 süogo aser 63,000 tashi pei aliba tesem toktsür yipru dang nungi jenogo.
Micronesia asetkongtem nung yimsüsür ka tenüng jaloktsüba yipru, Soudelor ya National Meteorological Center-i asadangba sülen ashiba agi Deobar aonung tashi nungbo iba yipru süshitsü.
Iba yipru arutsü osang angashili Fujian aser Zhejiang tzükümlen alirtem tajemba agi parnok nisung 250,000 tashi tesem toktsür jener liasü. Iba yipru yagi anüdoklen aliba tzükümlen electricity aser alu nung tsünütsütem raksatsüogo, ta media ajanga ashi.
Iba yipru yagi Taiwan nung anentsüh tulu aludakja süngdonglidong shisaa laodaktsüba ajanga lenmangtem nokdangba den külemi nisüng million aika talidak meli-i kümdaktsüogo.
Brihostibar nü arishi küm 8 tetsür tanur ka, tetsü aser la den jakrep ka dena tzüyimleni punger aoba mongi lir tang la tasüngmang anguba sülen, tang tashi nung yipru agi asür parnok trok kümogo.
Taiwan nung iba yipru anenogo ta Deobar nü osang agütsüogo ajisüaka ano tzünglu tesashi alutsü ta metetdaktsüogo.