Taj Mahal ‘chandelier’ tsük, bushisüngdangtsü tuyuogo

Agra, August 22 (Agencies): Küm noklangzüng 17 buba mapang yangluba Taj Mahal tongti kiküm nung British mapang copper seret 60 agi yangluba chandelier ka tawa tsükogo, iba kuliji Archaeological Survey of India (ASI) lenisüba nung bushisüngdangtsü.
Metong nung feet trok aser lenden nung feet pezü tsüngbang milen, chandelier ji Lord Curzon-i agütsü aser 1905 küm Taj Mahal, Royal Gate nung inoka ayu. Iba chandelier Bodhbar nü tsükogo.
ASI, superintending archaeologist, Bhuvan Vikram lenisüba nung iba kuli bushisüngdangtsü tuyuogo, ta kasa osang ajanga ashi.
“Tia kaa iba anasaji shinga maliasü, aji mesüra lendong tulu ataloktsüsa liasü,” ta raliwalirtem anishir, Ved Gautam-i ashi.
Brihostibar nü Agra ASI tongti, Bhuvan Vikram Singh-i, chandelier ji junga reprangshimba sülen ang tanaben inoktsü, ta metetdakja liasü.