Tajangzük agütsüba mapa inyaktsüla

Terenlok mapasa süaka karbo tajangzük magütsüba mapatema lir aser karbo tajangzük angutsüba mapatem lir. Anungji, terenlok mapa ana tsüngdaji asenoki bendangteta asen nüngdak inyakra, iba jagi asenok tajangzük maneni nguyonga aotsü aser anisüngzüka alitsü. Tanü asenok pei nüngdak meperitet timatemba ya asenoki meinyakba agi masü mesüra government-ia terenlok mapatem asoshi sen meindokba agia masü saka asenok sentong majungba ajanga lir, kechiyong asenoki tajangzük maneni angutsüba terenlok mapa meinyaker. Tatishitsü, agi asenoki alu ayimba, chiyongtsü yanglua ayokba mesüra shiruru metsüba aser nüngdak oset tapu balala yanglua yimertem anisüngzüka alitsüsa lenmang bushitepa terenlok mapa inyaktsü melen yimkong senden alidak ( panchayat/ community hall) mesüra yim süngküm yanglutsüang tongtibangba amato bilema inyaker. Ibayongji, tesem tesem nung farm aser factory tapu balala lapoka semzükba osang angashitsü melen yimsüsür aser tulurtem jaoka village gate aser community hall semzükba osangang angashir. Atangji, itemjia osang tajung saka yim süngküm aser community hall agi nübortem tebok masüngtsü aser tanurtem admission-a magütsütettsü. Tanü asenok shiranger anepalutsüa sen maka, tanurtem kaketreju balalai yoktsü mapang arudang shisabolur aser anogo shi kidang kinunger nüngdak meperiteter ta timatemba mapang ya asenok ajaki shisa bentepa tajangzük angutsüsa sentong kar tenzüktsü bilemdangtsübaji kanga tongtibang kümogo. Aji oda, arogoia tenla ki yanglutsü dang bilemer aser yimtenia community hall yanglutsüang bilemer ta süra nübortem tebok tazüng item kidangji adenshia rarateptsüsa akümtsü. Tanübo joko yimsüsürtem nungi tenzüker tsürabur aser tanurtem ajaki alima nem tajangzük agütsütettsüsa mapa tasen purapiteta inyaktsü bilemtsüla. Asen lima nung süngolemba, süngjanglijang aser mozü aketba süngdonglidong aser naro tapu aika lir. Item dakji aketba tagitsütemji asenoki memetetba agi asenok timatemer. Item nüngdakji reprangteta asenoki item tagitsü bushitettsüba mapatem nung senotsü endoka terenlok mapa inyakra, item mapa nung jagi aruba tajangzük aser asenoki asenoksasa kangabo mebelemi tenla kia sütettsü aser community hall-a yanglutettsü. Tanü putu yabo nübortem nüngdak bushitettsü merangba putu lir. Ibaji nübortem tesangwa nüngdakba mapang nung electric light bushiteta agütsüba, gari nüngdakba mapang gari yanglutetba aser mozü nüngdakba mapang mozü tapu balala yangluteta nisungtem nem taneptsü agütsüba amato asütsü. Itemji mapang mapang shia nübortem nüngdak reprangteta nisung kakati inyakba mapatem lir. Kasaji tanü asen lima nung lanurtemi inyaktettsü. Teinyaktsü kaji government-i o aser mapa agi ajungshitsüla. Joko, tenlaki aser community hall tuluba aser tajungba asütsü tokteptsüba putu mapang masü saka nübortem nüngdak reprangteta agütsütsü tama raktepba putu ka agi asenok tongogo. Iba ama mapang nung asenokbo tajangzük maliba mapatem nung dang temulung agütsüra, item kitem nungjia ronga meteptet timatemtsü aser asenok kibong aser taküm peisasa menokdaktettsü. Asen lima aser lokti nung nisung kar anisüngzüka aliba agi asen lima aser lokti animesüngzüktettsü. Asen lima aser lokti tesünep nung alitsü atema kija aser kibong shia tesünep nung alitsüla. Nisung shinga mapa teinyaktsü maka masütsüla, nisung shinga tebok tazüng memejangtsüla, nisung shinga makamaitba agi school mazüng manentsüla aser nisung shia senotsü makaba agi mozü malitet masütsüla. Iba amaji maksü timtem majurutsü atema government lir aser government-ji Kohima aser Delhi nung dang masü asen alidak tonga aruagi government amenoka lir. Asenokiang asenok den item nüngdakji repranga inyaktsütsü asenok den government mali ama bilemer. Iba jagi nübortem nüngdak meinyaktsüdang aser teyari agi nübortem matongdang ola madoker. Aji oda, ola adoktsüla nung madokba agi tangari asenok ya suwar amai bilemer, iba jagi mezüngmeshir ! Ibaji bilemdangdi.