TAJCF-i Amguri-Mokokchung lenmang nokdangtsü

Dimapur, August 28 (TYO): Asenoki Tuli Paper Mill ta ajaba industry koba dang  Nagaland Pulp & Paper Company Limited (NPPC Ltd) ta ajar, iba ya tanaben shia arudakja lapoktsü asoshi tenangzükba aiben agüja jembiaka mapa küma inyaka mesayuba agi tejashi sayua Tuli Area Joint Council Forum (TAJCF) longkak aittsü telemtetba agiogo.
Parnoki sangdongba osang ka nung ashiba agi, NPPC Ltd ya tanaben lapoktsüsa August 31, 2016 anogo tashi nungji government-i mapa tenzüka meinyakra, nübortemi September 1, 2016 nü nungi kecha anogo telemtet ka maka Amguri nungi Mokokchungi atuba National Highway 61 lenmang nokdangtsü ta metetdaktsüogo.
TAJCF tenüng nung Nagaland nung Industries & Commerce Secretary dangi züluba shidi ka nung, tang tashi nung NPPC Ltd asentenshia lapoktsü asoshi jembiba aser inyakba maparentem nenshia metetdaktsüogo aser itemji reprangdanga August 31 tashi nungji meinyakra, TAJCF ajanga September ka nü nungi National Highway 61 nokdangtsü, ta TAJCF tir Wb.O.Benjong Jamir aser Tezüluba Wb.Mar Lemtur nati metetdaktsüogo.
Iba sentong takok ngua inyaktettsü asoshi nübortem ajaki yaritepdaktsüner ta parnokisa mepishia metetdaktsüogo.
Ano, kasa tebilemtsü metetdakja, NPPCL Workers’Union-ia Nagaland Chief minister dangi züluba shidi ka nung, India government-i Tuli paper mill asentenshia lapoktsü asoshi sen crore 12 agütsüogo ta jembibaji shitakba agüja lir mali jangjashidaktsüner ta metetdaktsüogo.
Aji oda, taküm 2016 küm May 31 nü Chief ministeri  India sorkari Hindustan Paper Corporation nem sen crore 30 agütsütsü nangzükogo aser iba sen nung jagi sen crore 12 Tuli paper mill nung mapa tenzüktsü atema NPPCL nem agütsütsü ta metetdaktsüba ama iba senji India government-i agütsü asü magütsüar jangjashidaktsüner, kechiyong tang tashi nungbo Tuli paper mill shia arudaktsütsü asoshi kecha mapa meinyaker ta NPPCL Workers’ Union tenüng nung parnok tir Wb.Noklenlemba aser tongti zülur Wb.S.K.Das nati metetdaktsü.
Parnokisa  Chief minister dang, tang tashi nungbo paper mill nung inyaker nem ita sen agütsütsü melen training agirtem nem dang stipend agütsür, anungji inyakertem nema ita sen agütsütsüla aser mapa shitak repranga inyaktsü atema Managing Director (full time) ka shimtsüla ta takangba ka metetdaktsüogo.
Ano, paper mill nung inyakertem telongjemisa tang aliba Board of Directors nung Mokokchung Deputy Commisioner dena enoksemtsüla ta takangba ka agütsüogo.