Tajemmetdak Lung – Ibri 12: 5-17

Taküm nung tia majung mapang jagi asenok ajemaludaktsür aser tashi angadaktsür. Abraham Lincoln (1809-1865) American President rongnung Tsüngrem metetba aser takok angur president ka liasü. Pa lanuwa timtema liasü. Pa schoolia küm ka mejungjai ka dang ao. Pa business nunga tamakok angu (1831) aser 1832 election nunga tamakok angu. Tanabena pa business nung tamakok angu (1835). Speaker atema tamakok angu (1838). Pa kodang sati asü, pa tebutsüji pa atema khuret ka aküm. Jabaso pezü rongnung ka dang küm 18 tashi ali. Pa Senate nung Vice President atema tamakok angu saka 1860 nung pa President shim!
Iba lima nung tamakok manguba shinga mali! Shirnoki Tsüngrem tsübur parnok asoshi tamakokji tatembang masü. Tamakok, timtem, tesama ajakji Tsüngrem maongka nungbo tashi angaba angazüka amshitsü akok.
Kechiba Tsüngremi asenok timtem aser tajemzükba tia ajanga anir? Ibri 12:9 nung temulung süa telangzüba agütsür: “Techir süaka, pa timtem-tuoshi anguba agi tashi angatsü angazük”.
Tia kar dak alaka, taküm nung tamakokji Tsüngrem O aser Pai mulungba nung tashi mangaba ajanga ajurur. Tamakok ajanga Tsüngremi temulung agütsüba angazüker. Tamakoki asenok ajemaludaktsür. Lepshia tamakok angu agi asenok Tsüngrem tsüngdang apudakdaktsür. Asenoki tamakok nungi mangazükra, asenoki tamakok dang angazüker. Tenüngsang Ken zülur taküm kuliji angang! “Ni timtem agi metongi alidang ni aibilena ao; saka tangbo ni Ne O benshira. Ne telatet ozüngtem ni angazüktsüsa ni timtemdaktsübaji ni atema tajung lir” (T.Ken 119:67,71). Tamakoki asenok tekong temerang raksatsür aser melamelaa tashi angadaktsür.
Tamakok kar asenok alema lir, saka itemji timba asenoki inyakba alir. Item tamakoktem nükjidong yur bushiba agi mita alitsü aser kümdanga alitsü sayuba ajanga koda paidoktsü sayur. Ochi aser temulung lemtetba dang taochi ajanga takokji nangzük.