Tajen Ao Road junga yanglutsü kaketshir tentettemi mepishi

Dimapur, August 10 (TYO): Dimapur Sumi Students Union (DSSU), Ao Students Union Dimapur (ASUD) aser Dimapur Lotha Students Union (DLSU) Tirtemi sangdong ka ajanga Dimapur nung City Tower nungi DC Court Junction tashi lenmang, Tajen Ao Road ketdangsüa yanglur Public Work Department (PWD) dang, mongpu balala ajak tizüktettsüsa iba lenmang kanga junga yangludaktsüner, ta mepishia metetdaktsüogo.
“Iba lenmang ya tamajungtiba anepalur, aser tzü atsüngba agi lenmang yanglushiba sülen ita ka majungdangyongi raksar, iba den külemi DETAILED PROJECT REPORT (DPR) ama meinyaker,” ta sangdong ajangasa metetdaktsü.
Kaketshir tentet asemisa, iba lenmang atema senotsü kwi lemzüktsü, ibaji timi amshitsüla aser kechi südir süaka senotsüji tezüleni meyoktsüla, ta metetdaktsü.
Tang iba lenmang teyanglushidak ya kaketshir tentet asem nungi züngsemtemi kanga junga mita reprangdar.
“Iba mapa takok ngua inyaktsü aser tembangtsü atema kaketshir tentet asemi amaliteptsü aser akokba tashi agi yariteptsü,” ta kasa sangdong ajanga metetdaktsü.