Tajen Ao Road mapa agi melung masür: AKTD

Dimapur, September 14 (TYO): Dimapur nung Tajen Ao Road yangluba agi melung masür; iba mapa atema sen crore 19.4 lemzükjaka mapa kanga sapetrapeta inyakogo aser melung masür, ta Ao Kaketshir Telongjem Dimapur (AKTD) Tir, Lanutoshi Aier aser tongti zülur, Moayanger Jamir nati sangdong ka ajanga metetdaktsü.
Iba project tembangtsü atema construction firm/company-i kanga aritepa inyak ama reprangteter, ta sangdong nungsa shia lir.
Chief Engineer, PWD (R&B) office sangdong ka ajanga, “iba lenmang raksaba tongti kuliji, Assam tsütsü nungi lisem abenba gari tulutem senzüba ajanga lir,” ta shiogo. Item ama sangdong agütsüba ajanga department-i parnoki lisem aser tanga khu abenba gari tulu senzütettsüsa gari lenmang tashi itta meyanglutettsü ta ashir asü? ta AKTD sangdong nung shia lir.
“Lenmang raksaba kulitem rongnung Assam nungi atuba truck tem ajanga lir, ta ashibaji khenyongi temenünütsüka lir. Nüburtem dang tatemtsü meshii department-i parnoki parnok teinyaktsü meinyaktet ta nangzüktsüla. Nübur matsüngdang ochimashi jungkai adokba ya tang mezüng masü,” ta kasa sangdong ajanga metetdaktsü.
“Iba dak sendakba nung AKTD-i iba lenmang yangluba tenük zünga yoka reprangdar, aser ola madoki dangbo malitsü. Tajen Ao Road nung aliba council temia iba onük nung tiyongi aita iba mapa ya inyakyim nung lateta aliba ama inyaktsü aser mongpu ajak tizüktettsüsa yangludaktsütsü atema inyaktsü ta office-i tamang akar,” ta sangdong nung shia lir.
AKTD-isa, tawa Auto Drivers Union-i longkak aitba mapang nüburtem nem city bus service agütsüba atema Dimapur Deputy Commissioner, Kesonye Yhome (IAS) nem tenüngsang agütsü.
“Maneni city bus tem tongtibang tesemtem nung senzüdaktsüner, kechiyong city bus rate ji kanga dalang aser talisa kaketshirtem atema kanga junger. Auto-rickshaw nung senzüba atema sen kanga tali meshir aser jenjang melenshipet melenshir. Anungji administration-i bus service asentenshir tenzük nungbo kanga pelatsü aser Dimapur sensotema kanga anisüngzüktsü,” ta AKTD-isa mepishia metetdaktsü.