Tajikistan nung nisung 10 shi tepset

Moscow, September 05 (Agencies): Mejangjatetba prangpong abener telok kati Tajikistan yimtiba, Dushanbe nung yashi lendong tesashi ka atalokdaktsüba osang jangjaogo.
Yashi atalokba lendong nung amaker 2 aser police ketdangser 8 densema parnok 10 shi asüba osang jangjaogo ta sorkar ketdangser kati tanü Honibar nü metetdaktsü.
Yashi lendong atalokba sülen Dushanbe nung tentetba US embassy ki-a shibangba osang jangjaogo.
“Ozü deputy defense minister, Major General Abdulkhalim Mirzo Nazarzod sülen anidakertemi yashi lendongji ataloktsüba osang bushitetba sülen ozü Tir, Imomali Rakhmon-i Nazarzod yimsüsütsü menden nungi anentsüogo,” ta Tajikistan interior ministry-ia metetdaktsü.
Tajikistan nung tentetba Islamic Revival Party yimtenren telok lenisang, Nazarzod ya taoba mapang nung sorkar anemer telungpur ka liasü saka 1997 küm yimjung tezüngzüktep ka agiba sülen pa nem Tajik armed forces lenisüba menden agütsü.
Tesüiba mapang Soviet linük nung densemba Tajikistan nung 1992-97 tashi nübur o nübur na tsüngda tongpang kanga sashia raraba sülen tanüa par tensa kanga mejungi aliba osang bushiteta lir.