Tajung anogotem atema lenmang shitak nung jajadar: Advani

Ahmedabad, November 22 (Agencies): Bihar assembly election nung BJP-i tamakok anguba atema BJP lenir tain LK Advani-i Ato kilonser Narendra Modi anema jembia aruba sülen anogo ishika dang lir tanü Advani-i, linük nem ‘Tajung Anogotem’ bener arutsütsü atema sorkar lenmang shitak nung jajadar, ta ashi.
Tanü Ahmedabad Municipal Corporation election nung Khanpur tesem nung vote agütsüba sülen osangbenertem den jembidang Advani-i, “Maparen ajaki pei mapang agir ta ni bilemer. Sorkar lenmang shitak nung jajadar asünungji tatem nungbo tajung ajangzüktsü ni imlar,” ta ashi.
Modi’er sorkari Lok Sabha election mapang ‘tajung anogotem’ bener arutsütsü ta nangzükba nung tamakok angu asü, ta pa dang osangbenertemi asüngdanga liasü.
Ahmedabad densema municipal corporation trok atema state nung tang election agidar.
Bihar election nung BJP-i tamakok anguba sülen Party lenir taintem- Advani, Murli Manohar Joshi, Shanta Kumar aser Yashwant Sinha nungeri, tesüiba küm ka nung party jenjang tamajungba akumer, aser item kuliji terabo metettsü tim, ta takhangba agüja liasü.