‘Tajung anogotem’ nangzüker BJP-i nübur mashioktsütsüla: Sena

Mumbai, July 23 (Agencies): NDA sorkar teloktep den dena aliba party, Shiv Sena Tir Uddhav Thackeray-i tanü BJP aija, ‘tajung anogotem’ nangzükba ajanga Centre nung BJP tashii aruba sülen temelenshi kecha mali, ta ashi.

“Taoba sorkari teraksa bener aruja alibaji bentettsü asoshi küm 50-a teperi masü, saka nüburtem tebilemba ataloktsütsü asoshi taruba küm pongu nungji mapa aika inyaktsüla. Nenoki (BJP) nüburtem dang ‘Tajung Anogotem’ nangzükogo, anungji tangbo nenoki parnok mashioktsütsüla,” ta party ‘Saamana’ den interview agiba mapang Sena tongti lenir Thackaray-i ashi.

Tasüngdangba ka langzüdang Thackeray-i, Centre aser state nung sorkar melenshiaka ‘tamentaktak’ nungbo kecha temelenshiba mali,” ta ashi.

“Anepdang shia asenoki osangkaket ka lapokdang asenok khen laakdaktsür aliba kasa osang dang züngshir. Iba osang yabo tamalen züngshiogo ta bilemer. Iba nungji aluyimertem soseta asüba, mapa mangurtem lungkak aitba aser tetsürtem anema inyakba densema lir,” ta pai ashi.

Kashmir nung Pakistan wako ayipshiba dak sentakba tasüngdangba ka langzüdang pai, “Mapang talangka ibaji mengui liasü,” ta ashi.

Jammu & Kashmir nung PDP den lokteper BJP-i terenlok bener arutsüba dak sentakba nung tasüngdangba ka langzüdang pai, “Ni kechi sütettsü (?) Iba ya tebangkatsüka lir. Ni shinga dena tsükchitepa mali saka election magidang Mufti Mohammed Sayeed den nenok (BJP) tangatetba kechi liasü (?) Pa indang yimtenren inyakyimji kodaser nenoki (BJP) amatok (?) Kashmir nung terenlok lira tepelatsü. Ajisüaka state nem senotsü aika lemzüktsübaji temelenshi masü. Yangji (J&K) aliba nüburtemi India dangi meyiptsüla,” ta ashi.

Thakeray-isa aluyimertem sentsüh küptoktsütsü indang onüka jembia liasü.