Tajung rongnunga tajungtibatem dang shimmer: Er. Krosü

Jotsoma (Kohima), April 09 (TYO): 27buba Angami Students’ Union (ASU) General Conference “Realistic Response” omen nung anogo asemnü amungba sülen Deobar aonung Centenary Compund, Jotsoma village, Kohima district nung tembangogo.
“Affirmative Decision- Realistic Response” onük nung jembidang PWD (R&B) Chief Engineer, Krosü Rhetso-i, “Kaketshirtemi aser lanurtemi pei nükjidong arshitsüji kanga tongtibang,” ta metetdaktsü.
Pai ashiba agi, lanurtemi tasümeiti malitsüla saka takok angutsü atema kanga meranga inyaktsüla.
Paisa, taoba mapangtem nungbo temsüa alir ajaki mapa maongka ngua liasü, saka tanü putu nungbo tajunger rongnunga tajungtibatemi dang sorkar sector nung mapa angur, iba den külemi nija sector nunga tetoktepba sashia lir, ta metetdaktsü.
“Nisung ka akümli nung maongka angur, saka asenoki ibaji agiteter asü masü, ibaji asenok dak keta lir,” ta Krosü-isa ashi.
Lanurtemi telemtetba shitak agitsüla aser takoker ka akumtsü atema nendaka aser kanga meranga inyaktsüla, ta paisa shisem.
Tanü mongdang tatemnübuba nung 2017-18 küm atema ASU office ketdangpurtem tasen shima liasü. Chakhro Students’ Union nungi Visako Rino ASU Tir shim aser Southern ASU nungi Vizhokho Zashümo tongti tezülur shim.
ASU Election Commissioner, Puthuto Natso-isa züngsem 15 tenüng sangdonga liasü.
ASU Assembly Secretariat Speaker atema Kekhrievituo Dahuo (Western ASU) shim aser SASU nungi Teisovi Thorie Dy. Speaker shim.
Sentong tatembangbubaji tatong Tir, Zekuseto Natso leniba nung agi aser Baptist Church Jotsoma Asstt. Pastor, Rokosieto Nakhro-i sarasadema liasü.
Organising Committee convener, Kelhouneizo Yhome-i tejkaokertem, ASU lenirtem aser tongtibang nisungtem pelaa agizük aser organising committee züngsem, Abei Thepa-i tepela anküp o jembia liasü.