Tajung Samaria nisung bike ajanga shiranger aika nem teyari agütsür

Jalpaiguri, January 27 (Agencies): West Bengal nung aliba Jalpaiguri district nung süngolu nung inyaker arishi küm 52 tain, Karimul Haque-i pa indang motorbike amshia, par yimtsüng aser temeket nung aliba nüburtem shiranga timtemer nem angati teyari agütsür.
Par yimtsüng nung Primary Health Centre (PHC) ana lir, saka iba tesem atongtsü asoshi kilometre ti nungi ter tashi jajar ang atonger.
Haque-i iba Tajung Samari mapa ya 1995 nungi tenzüka inyakba ngua India sorkari 68 buba Republic Day nung pa nem Padma Shri sempet agütsüogo.
“Ni ama nisung ka West Bengal nung tezülen aliba yimtsüng ka nungi iba sempet angutsü ni kodanga meimla,” ta Karimul Haque-i kanga pelaseta aser mamangteti ashi.
Par yimtsüng nung aliba nisungtemi pa tang “Ambulance Dada” ta ajar.
“1995 küm ammang tiyong ka nung kütsü, Zafuran Nessa temang mejungi aküm. Anungji onoki la doctor tangi anir aotsü asoshi yimtsüng nung gari bushia senzü, kechiyong ozü yimtsüng nungi doctor aliba tesem atongtsü kilometre 40 junga aoer. Saka onoki gari kata mongutet aser kütsü anepdang 2:45 ako nung asü,” ta Haque-i ashi.
“Ni iba tia ajuruba sülen motorbike ka ‘loan’ nung alir yimtsüng nung nüngdakbapur yaritsü molungtet, aser ni iba talongtsü aliba anogo nungsa iba talongtsü nung ‘ambulance’ zülu aser ‘anüngdang aonung ajak angati teyari agütsütsü’ ta zülusem. Iba anogo nungi tenzüka ni ozü yimtsüng nung shirangertem iba motorbike nung anir mozüki tashi angati anir otsür,” ta pai ashi.
“Ni iba mapa inyakba ngua mezüngbo nisungtemi ni kanga menüja liasü, saka meilongi nüburtemi kü mapa tajung ajiteta kü tenüng asang aser kü tang ‘Ambulance Dada’ ta ajar,” ta Karimul-isa ashi.