Tajung Samaria tem tenüng masüngdangtsü

New Delhi, April 24 (Agencies): Tajung Samaria, shirnoki lendong ataloker ka mozükidangi anir aoer, pa dang kangshia tenüng  masüngdangtsü iba den külemi police aser tanga ketdangsertemi tashiyim amshia parnok dang nija osangtem asüngdangra temerenshi tulu agütsütsü ta sorkari metetdaktsüogo.
State ajak nem temetetdaktsüba ka agütsüba nung Home Ministry-i, tajung Samaria anema khuret aser keno magütsütsü tuyuogo.
Iba temetetdaktsüba nung standard ‘operating procedures’ nung ashiba agi, gari lenmang nung nisung ka yirur ondaka lia nokdaka alir ka mesüra tajung Samaria kati police mesüra emergency services dangi phone call asüdang phone ajanga pa/la dang kangshia tenüng aser pa/la indang nija osangtem masüngdangtsü.
Kasa sangdong nung, “Tenüng ama nija osangtem aser tajung Samaria indang contact osangtemji pei sasa mulung nungang agütsütsü. Ketdangser shirnoki tashiyim ajanga tajung Samaria tenüng mesüra nija osang meshidir parnok nem temerenshi agütsütsü,” ta shia lir.
Timtem nung alir ka yarir nisung ka dang tajung Samaria ta ajar.
India nung kümshia gari lendong nung nisung lakh 1.4 asür aser sorkar osang ka ajanga ashiba agi, lendong atalokba sülen ghonda ka tsüngda nung yirua alirtemji hospital-i anir ora nisung shilem 50 bo taküm kümzüktsü. Lendong atalokba sülen mezüng ghonda ka dangji ‘hon ghonda’ ta ajar.
Ajisüaka nisung aikati parnoki yirua alirtemji yarira police mesüra medical ken o nung adentsü ta tsübuba ajanga timtemertemji meyarir.