Tajungba inyaktsü imlar

Nagaland state kümer 13 buba tatar senden tentetba sülen mezüngbuba senden anogo pongo nü tashi mapang peria agia amenbaji temelenshi tajung ka aruogo ta bilemer. Tang tatar senden nung amenertem rongnung teimbaka taoba tatar senden nung amener tatar züngsem tejenpurtem dang süaka tang senden nung ken o lemtepba ama taoba tatar senden nungbo shilem agia maru. Ashiko, parnok kar atemabo tatar kümer külen senden nung o jembidangbaji tang ya mezüngbuba liasü asütsüa akok. Atangji, nütsüng lakh 20 shi rongnung nisung roker shimer tatar sendeni yokbaji tangar jembiba angai yokba masü saka pei nübortem nüngdak jembii yokba lir, anungji jembitsüla. Ajisüaka, tatar senden nung jembitsüba ya nisung ka dak mulungjang nung alima aser nübortem nüngdak inyaktsütsü asoshi shisabolua bilemba onük kar melira tejembitsü makatsü, iba jagi aikati mejembir. Aji oda, tatar aikati pei lima aser nübortem asoshi shisabolua bilema jembir aser inyaker saka tatarsa süaka karbo kecha shisabolu mali kazüa senzür ama senzür pei mapang temadoker. Tanü Nagaland tatar senden nung amener tatartem asoshi jembitsüba onük tulutiba anaji, Naga yimten tebilemtsü lalettsü anendaka aliba mapa ya ka aser tangabaji  mapa ajak nung ochishia inyaktsü asoshi ajungshiteptsüba mapa asütsü. Taküm küm February nung election agitsü sangdonger külena Naga nunger asoshibo election masü saka yimten tebilemtsü ya tama latettsüla ta lokti tentettemibo ola adokogo. Ajisüaka, yimten teloktem rongnung balaka BJP teloki election agibaji Naga yimten tebilemtsü latettsü asoshi lir ta ayimoktsüba ken o mekoki election agiogo. Anungji, tang yabo Nagaland asoshi terenlok mapa inyaktsü aika liaka, election mapang jembiba amato Naga yimten tebilemtsü ya tatembang küma latettsü asoshi merangmatsüla. Tan tatar senden nung Chief minister-i ashi ama, Naga yimten tebilemtsü yabo kanga tebenja kechiyong India aser Myanmar (Burma) government na prongla den jembitsüla aser tenaprongla den külem ser kasa tangatettep ka Naga nungertem den meyanglutettsü, anungji Naga yimten tebilemtsü ya India den balaka aser ano Myanmar government dena balaka ta yanglutsüsa adoktsü. Kechi komaka shirnoki shirnok den tangatettepa yangludir yangluaka tatartemi tatar senden nung benoka jembir tatartemisa temulung agüja meinyak tashi, Naga yimten tebilemtsü latettsüba ya yazü asütsü. Shitakba bilemdangdi süra, Nagaland nung tang amai India nung agiba election tipdema agi tashi Naga yimten tebilemtsü mali ta tangari dang masü India nunger yimsüsürtemi bilema alitsüa akok. Ajisüaka, shitakba Naga nungertemi asangsang nung ajuruba tiajibo balaka lir. Joko, election temerji tatartema election nung endokba sen bushitsüang tebilemtsü tuluba ser mapa tenzüktsü. Iba denji ano Delhi nungi yokba sen agi yimten telok aika mesütsüsa adoktsü. Iba jagi Nagaland agi yimti tajung tulu küma aotsü melen yimtok ama metetmeteta küma aoba angur. Aji oda, election ka agili, Nagaland sentsü teimba, lenmangbo tamajungba, light tashi peria magütsütetba, tzü agi tanüngba, school aser mozü ki jenjangbo tamajungba ta küma aoba ya yimten tebilemtsü melatettetba ajanga lir ta India nunger o Naga nunger yimten yimsüsürtem na pronglai angatettsüla. Item tebilemtsü aser takoksa ajungaji tang Nagaland tatar senden nung mena alirtem teimbakati ajangshia lir aser tangateta angateta lir asünungji, parnoki tamalen dang nungibo tangsa temulung tagütsüba agüja inyaktsü imlar. Naga yimten tebilemtsü mali, anungji sarusachia kangabo mali aser peii aaba sen nungi percentage ka luzüka tangar nem agütsütsübo tejembia mejembir ta kodang asenoki asen lima tensa tia yanglutetdir, idangjiang Nagaland topur junga akümtsü. Nagaland-bo Nagaland saka iba ama alima tasen aser tajung ka nung asenoka alitsü aser asenok chirnurtem aser parnok chirnurtem pelatepa lia odaktsütsüsa tanü ataa alir Naga nunger tatartemi ochi agi Naga yimten tebilemtsü akoktsüsa inyaktsü imlar.