Tajungba kümnüba

Alima nung ajaki tajungba kümner aser akümtsü nüngdak. Item tajungba kümnertem rongnung Naga nunger kaketshirtem ya dena lir. Ibayongji, tan Tzürangkong nung Naga nunger “Tajungba kümnüba” omen nung Naga Students’ Federation (NSF) lokti senden mongogo. Atangji, Nagaland nung balaka tajungba akümtsüba nüngdakba telokji kaketshir teloktem ya lir. NSF ama kaketshir telongjem tentet ya Naga nunger longjemer Naga nunger meraket asoshi inyaktsü tentetba telok telongjem ka lir. Ibayongji, NSF teloki India map kübok state balala artsüdanga aliba ya magir saka Naga nunger aliba tesem ajak amsema Naga nunger longjema alitsü meranger. Iba jagi Naga nunger Nagaland, Manipur, Assam, Arunachal Pradesh aser Myanmar nung aliba Naga nungertem ajak longjemer Naga lima ka yanglutsübaji NSF nükla aser nükjidong lir. Aji oda, tang India kübok aliba Nagaland map dang nungibo NSF meyong Nagaland map-sa tuluba lir. Ajisüaka, tanü tensa Naga nunger yimten aser lokti jenjang reprangdangra, telemsa adokba aser tashi mait akümba anogotem agi Naga nunger kangshiba mapang lir. NSF teloki Naga nunger longjema alitsü jembia jembia NSF kübok liasüba Naga nunger kin karbo medeni oadokogo. Ano külen, Naga nunger longjemtsü jembia jembia Naga nunger yimten nüchiso bushir teloktem rongnunga telemsa teimba-teimba akümba angur.Iba ama tensa ka nung Naga nunger ajaki Naga nunger tia aser tensa mapang tajungba küma aotsü asoshi inyaktsübaji kanga tongtibang kümogo. Ano, NSF asoshi balaka putu tensa dak apet  teinyaktsü aika lir. Item rongnung NSF teloki Naga nunger longjemtsü asoshi nükjidong yur tentetba ama Naga nunger longjemtsü asoshi inyaktsübaji ajak dang nungi tongtibangba asütsü. NSF teloki angatettsüba kaji, Naga nunger ajak ka küma longjemtsüba yabo political party ajanga inyakba agi makoktsü, anungji NSF telokbo party politics nungi pilaa alitsüla. Atangji, Naga nunger lushi ajak yimten yimsüsüba ka kübok alitsü asoshi NSF nükla nung liaka, ibaji mapa küma inyaktsü asoshibo NSF telok kijaia meinyaktettsü.Aji oda, Naga nunger ajak longjema aliba sabang ka asoshi akok tashi NSF teloki inyaktsübajiang NSF mapa asütsüla. NSF asoshi Naga nunger ajak longjema alitsü atema inyaktsübaji, alushi longjemtsüba dang nungibo, tangatetba nung Naga kin ajak ajurutepa shilem agitettsüsa lokti telongjem sabang ka tentettsü asoshi meranga inyaktsübajiang tongtibangba asütsü. Aji oda, Naga nunger lushi ajak yimten ka kübok yur meputepi alitsü agibo, Naga nunger lushi yimten balala kübok liaka Naga nunger putepa lira, ibajiang Naga nunger asoshibo tajungba asütsü. Tang ya Naga nunger yimten ka kübok longjema alitsü merangba maparentem ya reprangdangra, Naga nunger melongjemtetbaji Naga nunger longjema alitsü merangba ajanga melongjemteti akümer amai atalokba angur. Ibaji asenok ajak asoshi tebilemdangtsü tuluka lir. Iba dakji alaka tanü Naga nunger tia tajungba akümtsü asoshi kaketshir telongjemi inyaktsüba tongtibang mapatem rongnung government nung ochimashi mapatem anema nokdaktsüba mapa ya asütsü. Iba tangatetba nung koba government südir süaka kaketshirtem telongjem telokbo government kübok inyaker amai meinyaki tanü aser asüng lima ajungtsü atema inyaker telok tongtibang ka ama bilema, kechi shitak aser ochi aji pusema inyaktsü aser kechi meshidak aser ochimashi lir, aji anema nokdaktsübaji pei teinyaktsü mapa ta angateta inyaktsüla. Tanü tia majung kaji kaketshirtemi kaketshirtem ajungtsü atema kangabo inyaka mangur aser ano külen government nung ochimashi aika liaka mangu aser mangashi ama toktsüba angur. Iba jagi kaketshirtem kanga akoksadagi. Tulur aser takar karbo state government-i kaketshirtem asoshi temulung agüja meinyakba agi makoksatsüa akok, saka tilar aser sensaker kibongtem nungi adokba kaketshirtembo government nung alirtemi ochimashi tilaka inyakba agi school mezüngtet anentsüsa akümtsü. Item nüngdakji reprangteta NSF aser NSF kübok aliba kin shia nung kaketshir telongjemtemi inyakra, memeteti aser meteta Nagaland aser Naga nunger tajungba kümer alitsü.