Tajungshi O aser O lebdang

~ Süpongnüngsang Longkümer, Darogapathar Village Dimapur.

Tajungshi ta asüba nung aika sendaka lir. Lenmang mengui timtema alir sayua ajungshiba, tajung reprangtetdang pelaseta ano ajungshiba, aibelena oya lia arütsür meyipdaktsütsü ajungshiba. O lepdang ya lokti asoshi onsara ajung o lepdanger melira lemtep-lemra tatembang mekateti atsüer aor, idangji tangateteri yakta o lepdang agütsür tembanger. Obendang ya o lepdang den kanga mesüktep saka ibaibo tamajunger atema amshiba o. Tatishitsü kar agütsüdi Tenla kidang Tsüngrem tsütsü.
1- Alima nung Tsüngrem meyong Sanji meimchir lir, Meimchir meyong Sanji meimchir masü anungji asen Sannüker, ozü Sannüker ta mesüi Nü Sannüker ta amshi tajungba. Yisui ashi San kidangi maitba kü Santem tezü nung aika lir ni itemji bushitsü.
2- Arogo ya alima aser meimchir meyong masü, aikati sarasademdang mesüra jembidang ozü Arogo, ozü nübur moajang ta sarasademer, anungji Nü Arogo, nü nübur ta sarasadem tajungba.
3- Tanüla temeshi tenüng nung An, Ak, mesüra shiruru mashi ka azü agi ki dak rüklokja meshiteter shi chiang ta ajungshiba dangji tom tanülai amshir ta Lai ajanga metetdaktsür, Kechiaser ibaji Yisu magizükba mesüra tatalaba angatetdaktsür. Kanga tekümdangtsü Mathi 7:21-23
4- Tatishitsü-metzüsener sadi kuli agütsüra tenzükba nung temulung magütsüba aser Arogo teinyaktsü memetetba angatetdaktsür.
Item mapa ya tai masü ama, mesüra tera aibelen ama saka masü tai tulu, Kechiaser Yisu jangja memetetba Arogo ya nisung meyong ama bilemba angateter. Iba ama dangi metongshitsüba aser maibelendaktsütsü ajungshiba aser o lebdang. Kechiyong kecha shiruru zü agia menen malangzüktet Khrista zü agi dang alangzükogo ta amanger.
1- Küm 42 shi süia odaki, 1975,76 nungi tenzüka Ao lima nungi asentenshi tenzüka tanüla temeshi sempet amshia arudang Laishir mongin aikati iba sempet amshitsü ya Yoel tapu 2 nung shinba Tenyar mapa tapu 2 nung atalokogo ta songtema liasü, saka tanüla temeshi sempetji tamang agi adoker. 2- Yisui küm meyika yimsüsüba mapang nung temeshipur den tesünep nung alitsü ta Isaia tapu 11 nung shina lir aji shidak, saka iba dakji alaka tanga mapang nungbo tesünep mangutsü ta shira iba dangji obendanger ta ashitsü akok. Kechiaser Yisui Kangki madak takok ngur külen nungi nütsüngtemi taküm tenla agüja alima kintem dangi osang tajung sangdongba tesünep tanü tashi, saka Tsüngrem O agi alima asüng nung Pa dak amangertem reshikangshi aser tepsetba tenzükogo 3-Tamangeri tamanger dang na kotaki maotsü ta shira aji obendangba mapa, Kechiaser Tsüngremji tenükmeba, aser tenük meremba Tsüngrem ta Laishiba nung angutsü. Nisung tamajung ka ni kanga sempara Tsüngremi pa dak rangloka temulung meyiptsü mapang agütsür aser ni ludaktsütsü, tetezü tamajungsang denji ni kecha balaka mali ta metetdaktsür. (Tenükmeba) Tsüngrem meteter kati Pa toktsür süngyanglu dangi meyipra süngyangluji teyanglur Tsüngrem masü, ni teyanglur Tsüngrem ta asen dak mepelai temenen taa agütsüra Pa dak alema tangar Tsüngrem mali (Tenük meremba) itemi Laishiba azüngeri Lai nung angutsü ta tatsüba agi lemsateper.