Tajungshi O

– Bendangtoshi Kohima, Arangtet MA.

Adianu Tsüknungpenzü-i züluba Tir Yimyim nung kanga tzüratema asükjang meronga züngogo. AKKOR, sorkar aser nüburtem tsüngta taoba putu ka tejakdang kanga rongrongshirong adoka zülumen memedemba ajanga aiben atsütepa aruba angashiogo. Iba mapang nung tangar Kin aikati oshioben aser kaketkeno nung asen Aor ajateta oadokogo. Kodanga memenüptsü. Asen Aori kati ka arishitepa tajung ka inyaka lira aji atsüzüka doktsütsü merangba shisatsü asen Aor dak keta lira itemjibo tezüng nungi rakteta endoktsüla. Engraji oshijibo zülumen kanga medema arangteta lirji parnok küla proof reading-ji magiyonga kecha masü nung. Kechiba süra computer kisüng agidanga parnok oshijibo type asüdang melenshiadokerji. Saka asen Ao oshi yabo Aor kabatemangna kasa zülumen amshiba aser züluba ajanga dang asen Ao oshiji tejakleni aotsü ta tangatetba aser nükjidong tulu yur kaket züluri züluba ajakji ASLB ajanga reprangshim sür külenang adoktsür. Iba inyakyim ya kanga junger ta bilemer. Saka onok Arangtet tatitang agidang proof reading junga magiba ajanga kaket aika nung zülumen balala zülua angudang koba tai koba shitak mejangjai zülua doktsür. Idakji aibensa tetsükdaktsüsa ajurur saka tetenzüker dangji yasürbo jungadoktsü ta lenir dak imlar.
Okola Tsüngnung-i zülubaji aitsür masü saka zülumen medema amshiba ajanga dang asen Ao oshi ya tangar den liromedema aotsü aser tejakleni aintsü ta tangatetba nung ASLB ajanga achaayanga arur südi. Tangar Kinbo aikati pei tetsü oshiji ketasena zülumen kasa zülutetba ajanga tangarbo talangkati oadokogo. Saka asen Aorbo zülumen memedemi pei zülunütsü zülua yutsüba ajanga tang tashi mangmangkorar. Anungji tang nungidanga zülumen koba shitak amshia aotsü ASLB ajanga anebelem mesasai maparen balala inyaka arudaki itemji maneni inyakyonga aotsüla aser nüburtemi nungita yaritsüla ta ka bilemer. Ya jurila mapa ka atema inyaker masü asen Aor oshioben tangar menüpa tejakleni anitsü nükjidong nung inyaker. Tangar kinbo pei tetsü oshi meima inyaktsüba angudang takar tulur aikati akhüm tetushi agüja parnok tenüng sanga senpet tululu agütsüba osangsa angashiogo. Asen Aorbo Koda!! Kümsa küm asen Ao oshi laoa liasüba aji mesotsü merangdang ano tetsükdaktsü aser tejashitsü asen lenirtem aikati lemsatepba angudang kangasa jashia bilemer. Kodaser tajungtiba agi Ao oshioben ya renloka aotsü ta bilemer masü saka destructive idea aika zülua angudang temulung ayanga bilemer ati. Hau temetongshitsü lemsatepbajibo kangasa junger ajibo agizüktsüla. Onok tang Arangtet tatitang agirtemi Ao oshiji ketasena kodaser zülumen shitak amshia Aor ajaki amshitettsü/zülutettsü ibaji nükjidong yur Arangtet tatitang zülua arudang item onüktem lemsatepba angudang onok kanga jashia bilemer. Anungji tang koba mapa tulu ASLB ajanga achaayanga inyaka arudagi, idakji maneni zülumenji nisung ajaki kasasa mamshitet tashi ka temulung agüja zülumen shitak amshir asü masü itemji repranga kakettemji adokdaktsütsüla.
ASLB lenirtem ajak nem pei tetsü oshi meima Aor tejakleni anitsü merangba angudang parnok ajak nem Konang nüngsang tulu agütsür. Tsüngremi linertem arishia dokjangma.