Tajungtibatem rongnunga mezüngpur

Tanü putu nung kaketshirrtem rongnung kaketshisatsü bushiba maparen ya reprangdangra kaket nung aliba kisüng ajak akok agibo tangar ajateta moutetba mapang ka lir. Tetezü, noklang shilem nung 99 angu agibo tangar memeneper, kechiyong noklang nung noklang angur aika adoker. Iba ama tashitemetet nung toktepba mapang tatidang nung telangzütsü purtem dang nungibo tasüngdangba renemtsü purtem khuretang tuluba akümer. Ibayongji, tang Nagaland Public Service Commission (NPSC) kangshiba angur. Aji oda, noklang nung noklang angutsü purtem asoshi tatidang nung asüngdangtsü atema tasüngdangbatem renemertemji anaben agia tatidang agütsütsü purtem dang nungi temetetba aser techiraba asütsüla. Tanü ama putu nung government mapa bushirtem asoshi tatidang agitsü atema tasüngdangba renembaji tangari renema akaba ajizüka renemba agibo majungtsü, tasüngdangba (questions) renemertem jagi ajak meteta makatsüa akok, kechiyong shibaibo ajak meteta ali, ajisüaka pai mesüra lai metetba nungi tasüngdangbatem renemtettsüsa pa mesüra la dak tashitemetetbo alitsüla. Ajisüaka, asenok tia majung tang NPSC purtemi iba ama nisungtemji bushia meinyaktetba tamakok ka nguogo. Government mapa nung süli, private mapa nung süli, tatidang agiba nükjidongji tajungertem rongnung tajungtiba shimtsü asoshi agir, kechiyong item jagi dang mapa akoktsü. Ajisüaka, ano tanü putu nungbo tatidang agiba ya tajungertem rongnung tajungtibatem shimtsüba dang masü saka tajungtibatem rongnunga mezüngpur shimtsüsa adoker, kechiyong tazünger aser tatidang agütsürtem ajak tajung dang, shiba shimer, shiba meshim ta asüba tensa tia ka nung tatidang agirtema timatemer aser shisaabolur. Iba ama toktepba mapang ka nung tatidang agirtemi tebang agi tasüngdangba kar asüngdanger mark agütsütsübaji tashi tulu aser kanga senti. Aji oda, alima asünungji tebang o agi tatidang agiba nungji ma ta tejak ajia yaritsüsa akümtsübaji ana nung dang lir. Iba ama nisunger yimyak dak aketba tashimait ka anguba agi, NPSC ajanga agir anüngba government mapa Group C nung alibatem asoshi mapa inyakertem shimtsü tentetba,  Nagaland Staff Selection Board (NSSB) ajanga agiba tatidangtem nungbo tebang o agiba tatidang asoshi mark-ji noklang nung shilem  (5%) dang asütsü ta state government-i latetshitsübaji tajungertem asoshibo osang tajung asütsü. Tamasabo NSSB ajanga agiba tatidang nung tebang o agi agiba tatidang atema  marks 12.5% yuja liasü saka NSF teloki anir kaketshirtemi iba mark-ji ajemtsüla ta akangba angateta government-i ajemtsübaji, atangji, lanurtemi government dang kanga pelatsüla. Tanü Nagaland shirangba tashidakji makamaitba timtem dang masü saka ochimashiba tashidak agi kangshir. Iba ochimashi ya vote agütsüba nungi tenzüka terenlok mapa inyakba, nübortem nem teyari agütsüba mapatem aser government mapa nung inyaktsü shimba maparen tashi nung bilemer mebilemjem aser zülur mezüluma ochimashi agi sünga lir. Aji oda, tatishitsü kaji,  mapang talangka Nagaland nung Nagaland police shimtsü atema osang metetdaktsüba mangu aser mangashi saka police-tembo zünger mezüngma shimogo. Ajisüaka, tanübo department karibo driver shimtsü tashi yimjak nung ajak nem maongka agüja metetdaktsüba angur. Item jagi, odang ashir ashi, karibo Nagaland nung ochishia inyaktsü merangdargo ta sayur. Aji oda, Nagaland ya jungjunga yanglushidi süra, yimsüsürtemi inyakba maparentem nung dang masü saka NPSC aser NSSB mapatema akangshitsüla. Iba telok ana yagi Nagaland government tenzükertem shimtsü, anungji Nagaland ajungtsü majungtsübaji parnok dak tuluka keta lir. Parnok asoshi shisabolutsü khurettemji – Nagaland nung nübortem tenzüktsü asoshi mashilen nungi shimra koda asütsü ? Nagaland nung mitkartem mapa sen agi ayok tenzükra koda asütsü ? Kar election nung tashiyim aser sen agi alia adok, kar sen agi alia ketdangser aküm, ano karbo kinunger aser temetetteper apia kecha mashi ser nung mapa inyaktsü shim ta süra Nagaland government-ji kechikomaka asütsü ? Item jagi kodaser Nagaland ya state tajungtibatem rongnung mezüngpur sütettsüsa yanglutettsü ? Atangji, itemji asenok ajak asoshi shisabolua bilemtsüba khurettem lir.