Takar mekümdaktsür

Tebok masünga meyutsütsü aser talilaa mekadaktsütsü saka teti parnok teyari medenibo kecha meinyaktettsüsaba tia ka nung yimten lenirtem aikati nübortem yutsütsü meranger. Iba ama tia ka nung ali nung dang nübortemi parnok akümtsübua tashi angatsü ta yimsüsürtemi bilemer. Ibaji kidang kiburi kiset shiruru metsüba amai lir. Anogo shia tebok sünga agütsür asünungji temeimbo meimer amai saka iba jagi taküm ka jangratema lia aotsü asoshi alimai yokba nükjidongbo mataloker. Tanü Nagaland nung Naga nunger aika iba tia nungji tasüa masür aser taina mainer ta alar-a masü kibura masü ta tom nung tepuokdak ayu ama aliba angur. Iba kasa tia nung public-tembo yutsür political party tapu balala nung lenirtem taküm aser kibong tia reprangdangra parnoksasa parnok nüngdakang meperitet timtemba angur. Aji oda, ‘public leaders’ ta ajaba purtemang timtatemba aser public-temang timtatemba ta aliba tia ka nung election ka aruli, idangji khen longsutepli, ano election ka aruli ta longsulongpena election tenüng nung party worker-tema sen terara amshiba dak alaka election tatem senotsüa tatem, joko asüng nungibo meshimetsülen senzütsü ta asüba tia ka nung alitsüsa party worker-temjia yangluja lir. Aji oda, election nung tongti shilem agia arurbo joko küm metsü-semer ajunger, saka pei kibong dena anepalu mesütet sensaker ta asüba public leaders aika lir. Ibaji public mechi timatemer masü saka peisasa pei timatemer, kechiyong iba tia nung alitsüsa parnok lenirtemi parnokji alena lir. Ibaji metettsüla. Political party nung public leader-temji public yaritsü purtem, ajisüaka parnoka parnoksasa meyaritet nungbo, parnoki nübortembo meyaritettsü. Iba tia nung tanü Naga nunger nübortem reprangtsü lenir aser yimsüsürtema mali ama kibong aika alaashidagi. Ibaji odangbo masü, kechiyong nübortem iba tia nung alitsüsa yimsüsürtemi toktsür. Ibaji parnok sentong aser parnok tangatetba balaka nung metetsümonga yamaji inyaker. Nübortem nüngdak peria kara aser nübortema pei tebok atema dang masü saka tangar kija kibong, yimten aser lokti yaritettsüsa lira, talisa election mapang nung parnokji sen agi malitettsü. Aji oda, election mapang nübortem sen agi malitetra tanü ama sen agi sen melentsü atema electioni aiertembo madoktsü aser adokyonga pei sünütsü süa nübortem meyong senotsü mamshitettsü. Atangji, pei kübok tashi angaa ayutsü atema yimsüsür karibo nübortem nem kani chidaktsür, ano karibo yi jemdaktsür aser karibo sen aatsüba lenmang masü saka mapang mapang shia sen terara agütsür. Item jagi nübortembo tepelashi saka parnok shitakba jenjangjibo kiset shiruru jenjang nung lir, anungji kiburi kodang chinüdir achitsü aser kodang yoknüdir ayoktsü mesüra tangar nema agütsütsü akok. Joko, taküma election mapang atongerji party worker-tembo gari tejen kakabo angutsüa akok. Aji oda, kanga nüngdakba pur süra gari tasena angutsü aser lanur lenirtema motor bike aser mobile set angutsü. Iba amaji sen aginür sen aser oset aginür oset aser mapa aginür mapa ta agütsütsüa akok. Idangjibo, party worker-temi anir nübortem ajunga tejembidang majung, alima ajak alizüka ayu ama bilema ngasangatemteptsü. Iba amaji lia election süitsü, takoker Kohimai aotsü aser makokertem electioni meidang ama nübortem asoshi kenüa mapang magütsütsü aser Kohima nung tadoker dena nübortemi majuruteptettsü. Iba amaji lia party workers, tanishirtem aser nübortem arishi süitemer. Joko, party nung lenirtemia aser nübortemia yimsüsür aser lenirtem mulungjang metettsüla. Election-i aidang party leaders aser nübortem nem agütsüba sen ya tsümartem dang nungi meshia agütsür aser election temer külen asenok tenüng nung aruba senotsü, teyari aser contract aser supply mapa ajak parnok nemsa agütsür. Iba amajisa longpet alongdang Naga nunger menüngreper. Aji oda, semchirsemnur tashi azükarua jangratema lia aotsü atema tanü asenoki khen vote mayok aremtsüla, khen makamait arema kechi shitak aji inyaktsüla aser temetenbo kecha marendaki jembitettsüsa asenok alitsüla. Iba jagi dang asenok nüji küma takar akümtsü.