Takar, Sensaker aser Shirangertem

Tasen Laishiba Yakob tapu 5 nung asenoki nisung tongtibang tapu asem angur. Item rong kaji takartem lir. Yihuda nungertem ya rongsen bushirtem aser parnoki rongsen kanga junga bushiteter.Iba jagi shin o ama ka nung nisungtemi jembibaji ” Yihuda nunger teka agi kongshibabo ajak hon akümer,” ta jembir aser aji shitak lir. Aji oda, Yakob nunger mapanga Yihuda nunger takar aika liasü, ajisüaka , tesasatsü aser tejashitsü kaji, parnok akabaji parnoki meranga aser ochishia inyakba nungi akaba masü saka ochimashi aser ayangertem nem taa magütsüi mezüngmeshia inyakdaktsüba nungi akaba liasù, anungji Yakobi item takartem dang parnoki meshitaki bendenba rongsenji magishitsü aser senmang küma moi samatsü ta shin aser metsütsüi küm ter shi sülen Yihuda nunger rongsen ajak Rom nunger meyong aküm. Atangji alima nung meranga aser ochishia inyakba agi takar akümba Laishibai maitsür. Aji oda, Tsüngrem tembar aser teindang nisung Abraham aser Yob na prongla kanga takar liasü. Parnok amaji tanü alima nung peisasa meranga inyaka akaba teindang aser Tsüngrem temeim angatetba nisung aika lir. Ajisüaka, ochimashi len nungi bendenba rongsenji Tsüngremi sempar, aji pei tenük agi ngua maka akümtsü ta T. Ken 37 nunga shia angur.Tanabuba telokji sensakertem liasü. Takartemi iba telok ya kanga mezüngmeshi aser memeimi amshi. Parnok nem hajara magütsü aser sensakertem jagi aji memeshitet, kechiyong parnok tashi tila aser okadak parnok temeten benoka jembitsü lawyer aatsü makoker, anungji parnoki Tsüngrem dang dang ashi aser Tsüngremi aji angashi, anungji Yakobi item sensakertem nem Teimla agütsü aser aremzüka Kibuba dak amangtsü ajungshi aser nenok sarasadem Tsüngremi angashiogo ta shia mulung süngzüktsüba asenoki kasa Yakob tapu 5 nung ya shia angur. Tasembuba telokji shirangertem liasü aser shirangba ya aseni temenen menaba agi asütsüa akok, anungji Tsüngrem dang dang masü saka asenoki tangar anema temenen menaa lira pa mesüra la danga taidok meshiang aser kati ka asoshi taneptsü meshia sarasademjang, iba jagia taneptsü angutsü ta kasa Laishiba tapu nung shia aliba angur. Yangi Yakobi ashiba tongtibang o kaji , shirangeri taneptsü  aginüra pai mesüra lai Arogo nung pastor aserr deacon-tem jaa sarasademdakjang ta ashiba ya asütsü. Yakob-ibo shiranger dang taneptsü angutsü atema ayong nung oa pongoktsü mashi, awatsüng nung oa monga shitoktsüa majungshi, tenla kidangi orr putir nem sarasademdaktsütsüa mashi, saka Tsüngrem tenzükertemji kidangi jar sarasademdakjang aser taidok nangzüktsü alinunga nangzükang , idangji taneptsü angutsü kechiyong temeshipurtemi sarasademba nung tashi lir ta shia angur. Asenok tamangertem asoshi arogo ajanga angutsüba temoatsüji aji ka asütsü. Ajisüaka, tanübo asenoki iba Laishiba dak ya mamanger asü (?) mesüra arogo tenzükertem dak temulung malem-ar, shirangeri taneptsü angutsü atema Arogo nung pastor , deacon mesüra tenzükertem ajababo kangabo mangashir, saka tangartemang ajar mesüra Prayer Home (private spiritual clinic) bushia aoer. Tetezü, asenok Arogo tenla kidangbo taneptsü angutsü meimlar aser sarasademba kia masü amai bilemer asütsüa akok, kechiyong asenok arogo tenla kidangba sarasademtsür majurutsüa akok. Asenok asentenshi nüngdakba tesemji ya ka asütsü. Atangji, Arogo ya lanurtem satitsütsü, tzüsentsütsü aser tasür den asüpila sentep sentong agitsü asoshi dangbo masü. Iba ama asenok tamangba tensa tia ka nung Yakob tapu bushia angatettsü merangtsübaji kanga tongtibang kümogo. Aji oda, Yakobi ajungshiba ama, asenok shirang dang aser shisabolu khuret agi anendang kechiba Arogo tenzükertembo majar (?) ta asenok tamangertemi aser Arogo nung tenzükertemia kanga süoki ia asenok tamang jenjang bushitsü kanga nüngdaka kümogo.