Takartem sen

Alima renlokba mapa ya sokari masü saka nisung ka kolok nungi adokba shisatsü (idea) aser rongsen agi renloker. Itemji shisatsü aser rongsen akar nisungtem lir. Iba tangatetba nung asenokia asen lima renloktsüba mapa ya asen kija mapa amato bilema inyaktsüla. Tang tashibo asenoki asen lima renloktsüba ya sorkari renloktsütsüla amato bilemer. Iba jagi asen lima merenloker. Iba tangatetbaji memelenshira asen lima ya tejakleni aotsü melen tesüleni dang oa adoktsü. Tanü iba kasaji atalokdagi. Sorkar yabo sentong yangluba nung yariteper aser alima tesünep asoshi ozüng yanglua amshitsü tentetba yimten ka dang lir. Anungji, asen lima renloktsü asoshi sorkar dak meimlai shisa akartemi shisatsü agütsütsü aser rongsen akartemi pei akaba senotsüji pei kija akatsü aser ulutsüba atema masü saka alima renloktsüba sentong nung amshitsüla. Atangji, akhidangbo alima renloktsü asoshi sorkari tesem ka mesemteta amenok aser ibaji town küma renlok. Ibaji administrative headquaters sür renloka ao. Ajisüaka, tanübo alima renlokba yimyaji yamaji masü. Iba putu nungbo nisung mali ser arem ka nung administrative headquaters ka lapokba kija agi iba tesemji yimti küma maotsü aser alimaa merenloktsü. Aji oda, asenoki jungjunga reprangdangra, asen lima nung tamalen akümba town-tem tuluba küma renloka aotsü melen tilaba-tilaba küma aoba angutsü. Ibaji asenoki asen lima agi city küma renloka aotsü asoshi sorkar dak kija imlaba ajanga lir. Ajisüaka, asen lima renloka aotsü asoshi takar kati arem nung oagi asüyonga industry ka lapokra mesüra mozü ki tajung ka mesüra kaketreju tajung ka lapokra, iba sülenji nisungtem anidaktsü aser nütsüng aika küma renloka yimti tuluka akümtsü. Iba mangdangji temulung nung yur tanü lanurtemi asen lima renloktsü asoshi khuretsa bilemtsüla. Tanübo, asenok ajak asoshi tia majung kaji takar süra electioni aitsüla ta nübortem tangatetba lir aser takarsangia bilemer. Iba jagi takarsang o nübortem na külemi takoksa ajurur. Iba jagi asen lima merenloker. Ajisüaka asenoki bilemdangdi süra, takarsang to election-i mai ser pa akaba sen agi asen lima nung ali tuluka mekazüka yur yangji industry ka lapok asübo, mozü ki tajung ka lapok asübo mesüra kaket reju tajung ka tenzük asübo, asen lima koda renlokla aser asen nübortem koda ajangzükla ? Ibaji jungjunga bilemdanger asenok tangatetba ya melenshia alima renloktsü asoshi inyaktsü tenzüktsüba mapangji tang lir. Tangar lima nungbo election aru shia temelenshi tajungba arur, alima tajungba renloker aser nübortem anitesüngzükba alir. Ajisüaka, asen lima nungbo election aru shia temelenshi tamajungba arur, takar aika sensaker akümer aser nübortem jenjang tamajungba akümer. Election ka aruli lenmang tamajungba kümli, mozü ki tamajungba kümli, school ki tamajungba kümli, office nung mapa makaba kümli, zünger mapa manguba tebilemtsü tuluba kümli, rakzükratemer tali adokli, züngpetzüngrar tali kümli ta alima tensa tamajungba-tamajungba küma aobaji asenoki takartem sen mapa shitak nung mamshitetba ajanga lir. Asen lima renloknüra, election ya takar akümtsüba atema sen yangluba industry ka lapoker amai mebilemtsüla. Election-i aiba ya takar akümtsü air masü saka nübortem tenzüktsü air ta asenok ajaki angatettsüla. Aji oda, sen akaba kija dak temulung lemer electioni maittsüla aser sen akaba kija dak temulung lemer electioni aitsü majungshitsüla. Iba jagi asenok kanga akoksaogo. Iba tangatetba nung tang nungi danga asenok tangatetba melenshir takartemi pei sen nübortem ajangzüktsüba mapatem nung amshira, iba jagi memeteti asen lima tesem tasem nung yimti tululu küma renloker alitsü. Idangjibo, lenmang tajung nung jajatsü, zünger mapa manguba tebilemtsü malitsü, tangaleni mozü ki tajung bushia maotsü aser asen lima nung kaketshisatsü tajung angutsü. Iba lima ka asoshi penzüa tanü asenoki shisalemsatep tenzüktsüla.