Takok Rongsen -T. Ken 119: 161 – 168

“Temakzükba oset angur nisung amato; ni ne O nung pelaseta alir” (t. 162). Rongsen tuluji asenok kodang angu? Yimya agi tongpang rara ka sülen rongsen tuluji angur. Iba tekong nung asen taküm nung tongpang rara ka tenzükba indang sayur.
Shi nisung mesüra yimya koloki Laishibaji tazüokba nung azüngtsü aser bushitsü mejangrar. Alimai aji maginer. Alimai Laishibaji sentoker, tiyazü aser amajok tebilemba nung amangdaktsüner. Satani Laishibaji sempar. Asenok koda sür Laishiba nungi piladaktsütsü pai pa tajungtiba inyaker.
Aji asü nung Laishibaji tejak o tejak na chitepa raradak ka akümer. Asenoki Laishibaji jangraa mezüdaktsütsü asoshi Satani jangratemtsü kaket aser magazine tamajung aika adokdaktsür aser agütsür.Laishiba melen item kaket tamajungtem azüngba ajanga Satani asenok taküm nung takok ngudaktsür.
Atangji Laishibaji takok rongsen lir. Iba nung takok angutsü asoshi ken ken rarateper. Saka ano idakji tepela lir. “Temakzükba oset angur nisung amato, ni ne o nung pelaa alir” (t. 162). Laishiba azüngba, bushiba aser ibaji rizünga ayubaji lenmang tajung ka lir. Taküm lenmang nung aibelen masütsü asoshi Laishiba nung kechi jungkai adoka sayur aji ne mulung nung rizünga ayutsüla. Laishiba bushiba jagi asenok taküm takar kümdaktsür. Lai bushiba jagi o ji dang angatetdaktsür masü saka na Tezülurji tali mesüka kümdaktsür.
Tamangertem shirnoki Laishibaji azünger aser bushir parnok anema Satani tongpang rara jazüker. Kechiaser nai kodang Laishibaji azünger aser bushir na Yisu mesük tali akümer.Nai tongpangji kokra, temakzükba oset nungji na pelaa alitsü. Tsüngrem O bushiba jagi na takar kümdakjang.Rongsenji agiang aser Laishiba bushiba tepelaji ne meyong kümang.