Takoksa sülen kümkümshir

Takoksa anguba sülen ang sorkari kümkümshia inyaktsü lemtetbaji, tashidak tulu agi menepba sülen ang mozü achi tenzükba ka mesüka asütsü. Tawa Dimapur nung apu chirepba lendong nung nisung asüamaba den külemi gari lenmang nung ongken paidokdang gari lendong aika atalokogo, item tatalokba sülen ang sorkar ketdangsertemi apu aser lenmang yanglushitsü lemtetba den New Dhansiri Bridge reprangshitsü lemtetba ya menur ang apitetogo ta bilemer. Apu aser gari lenmang yabo nija meyong masü, saka tulur-tilar, takar-sensaker ajak meyong lir. Anungji gari lenmang aser apu tajung yanglua mapangshia reprangshia anepalutsüji kanga tongtibang. Nagaland kidanger, Assam nung gari asem-pezü ayongayonga süiteptettsüsa gari lenmang alidang asen state nungbo National aser State Highway nung gari tila ana ta kangshia süitepteter, ano gari tulu ana süiteptsüjibo tejembitsü maka. Iba ama tia ka nung asenok lidar. Talisa asen Aortem yimdak yimtsüngtemi aodang Assam nungbo jangratema gari nung sanger senzür, saka kodang asen lima tongdir gari lenmang nung ongken paidok tenzüker aser atashitsü tenzüker. Ano tawatanü balaka Mariani-Mokokchung highway nung Changki aser New Camp na tsüngdabo gari tilatembo mesenzütettsüsa kümogo. Iba tesem nung moti tulu aika kümtetogo. Lenmang tesem kar nungbo Sumo gari anirtemi ajok agi tzü tatsü-talang asadanger ang lenmang shima senzütsüsa kümogo. Asen lima nung gari lenmang junga meyangluba dang masü saka lenmang tezülen motzü/kilentzü aodak junga malibayong lenmang nung ayong ama tzü ayimer, aser iba kuli ya ajanga lenmang kera raksar südi ta bilemer. Ano külen gari lenmang aika nung akhidang yangluba apu kodang ang chireptsüar memetetba tia nung aika alitsü südi. Kiojen asüyonga mesüra gari lenmang nung apu asüyonga chirep matai mesüra lendong atalok matai mapang shia reprangshir nüngdak dang süra khenyongi bendoker tasen küma yanglutsü nüngdak. Tawa Chathe ayong tepdanga yangluba apu lendong nung asen Naga nungerbo taküm ka danga mesama. Ajisüaka iba lendong nungtu asen Naga nunger nisung 20-30 tashi asü ka asübo ketdangser karbo aija anendaktsür lila mesüra karbo tepuokdak lila ta bilemer. Iba apu chirepba atema shingaia khuret magi mesüra shinga maitsü. Oda Tsüngremer mapang ka nung iba apu chirep sülaba! Asen lima nung apu chirepba ajanga yaküm March 31 nü Kolkata nung flyover ka chirepa nisung 27 asüba tatalokba tu bilemteter. Iba lendong atalokba atema company-i Tsüngrem nem ang tai tonglokja liasü. Hyderabad nung amenoka aliba infrastructure company IVRCL Group Head (HR & Admin), K Panduranga Rao-i, “Iba ya tanga kecha tai masü saka Tsüngremi inyakba lir,” ta aitsü. Iba tatalokba bushisüngdangtsü atema West Bengal Chief Minister, Mamata Banerjee-i committee ka tentet, aser anogo 10 tsüngda iba committee-i report agütsüba nungji, “Design meshidakba, kiojen yangluba osettem quality tamajung amshiba aser junga ketdangsüa meinyakba ajanga flyover chirep” ta metetdakja liasü. Iba tatalokba atema apu yangluba company nungi director tem densema ketdangser 10 tepoukdaki yok. West Bengal nung amaji Chate ayong apu chirepba ya bushisüngdanger aibelener nem temerenshi agütsü asübo company aser contractor tem atema tansütsü ka süla. Ajisüaka tia maka shinga maitsüi tembangogo. Gari lenmang aser apu yanglubaji tatem masü saka ibai mapangshia reprangshia anepalutsüla. Lendong ya ajungbena memeteti ataloker, ajisüaka asenoki paidoktsü akokba lendonga aika lir.