Taküm, 2015 küm ya tatsüktiba küm lir: WMO

Geneva, November 25 (Agencies): Taküm, 2015 küm ya tatsüktiba küm lir ta World Meteorological Organization (WMO)-i tanü Bodbar nü metetdaktsüogo.
Ajisüaka, alima nüburtemi alima tali tatsükba akümba azüoktsü asoshi nüngdakba maparen meinyaki oda toktsüba ajanga alima Celsius (C) 6 shi agi tatsükba küma taruba 2016 küm taküm dang nungi tatsükba asütsü akok ta par telokisa metetdaktsü.
Alima tatsükba akümbaren 2C shi agi tajemba kümdaktsütsü nükjidong nung alima lenirtemi taruba Hombar nü nungi tenzüka France yimtiba, Paris nung Climate Change Summit senden ayonga lir.
“Alima lenirtemi tan senden amenba ajanga alima tsüka akümbaren 2C agi tajemba kümdaktsütsü akok. Ajisüaka, meimchirtemi alima tali tatsükba kümdaktsütsü maparen mazüoki oda yutsüra, alima ya kanga dang tsüka akümtsü,” ta WMO nung Director-General, Michel Jarraud-i metetdaktsü.
“Alima tali tsüka kümdaktsüba greenhouse tango tajemba adoktsütsü lemtetaka, taoba mapang ama dang shishilembabaren inyaktepra, alima ya 6C shi agi tali tatsükba akümtsü. Anungji, Paris nung senden amenertemi telemtetba tajung agitsü nungdaker,” ta pai ashi.
Paisa ashiba agi, El Nino ta ajaba tzüyim mopung tali tatsükba akümba aser meimchirtemi tango tamajung kanga sashia adokdaktsüba ajanga alima ya anogoshia tali tatsükba akümer.
“1880-1899 mapang industry tulu tentetba jakdang alima 14C tatsük liasü saka 1961-1990 tsüngda nung alima 1C agi tali tatsükba akümba osang bushiteta lir. Ano, taküm 2015 küm January ita nungi October ita tashi nung alima 0.73C agi tatsükba akümba osang bushiteta lir aser iba ya alima atema osang tamajung lir,” ta Jarraud-isa shisem.