Taküm-a Koba Yimyim ?

Alima nung democracy tulutiba linük, India nung election jakdang yimyim tajung ka sangoktsüba ajanga linük nung tesem balala, tamangba yimsü balala, kin balala aser oshi-open balala süaka nüburtem puadaktsür aser longjemdaktsür, aser ibaji ajanga election nung takok angur. 1971 küm Lok Sabha election atema nüboyimba mapang taoba mapang Ato kilonser, Indira Gandhi-i India nunger dang ‘Garibi Hatao’ (sensak tia agientsü) yimyim sangoktsü, aser ibaji ajanga nübur melung kokteta lai aniba Congress party-i election nung takok angu; 1977 küm election nung opposition party aikati longjemer Janata Morcha (People’s Front) tentet aser parnoki “Indira Hatao, Desh Bachao” (Indira agienang, linük kümzükang) yimyim sangoktsüba nung ajemdaker parnoki nübur melung kokteta takok tulu angu; yamaji 2014 küm Lok Sabha election atema nüboyimba mapang nung Nardenra Modi-i “Achhe Din” (Tajung Anogotem) yimyim agütsü, aser ibaji ajanga pai aniba BJP-i takok tulu angu. Yamaji state assembly elections nunga party balalai yimyim balala aser tenangzükba balala ajanga nüburtem melung kokteta election nung takok angur. Ajisüaka yimyim ayimba amaji atangji nung inyak asü meinyak, ibaji nüburtemi seret odanger tanaben shimmer mesüra agiener. 2004 küm BJP-i “India Shining” yimyim ayim ajisüaka India nunger rongsenkettsüng jenjang asadanger voters-i parnok meshim. Yamaji taküm Lok Sabha election agitsü lia nübur melung koktettsü atema koba yimyim agütsütsü? ta bilemer, ajisüaka nüburtem seret odanger ang votes agütsütsü. 2017 küm election nüboyim sentong ka nung jembidang BJP Tir, Amit Shah-i, “Ozü party tongtibangtiba onükji ‘India nung Congress Party meshimeshia samatsütsü’ lir” ta jembi; yamaji parnoki linük nung Congress party jenjang kanga mejungi kümdaktsüogo. Aji oda tang mezüng Mizoram state dak alaka Northeast nung tanüngba state ajak nung BJP densema sorkar kümogo. Tang Punjab, Mizoram, Karnataka, Puducherry, Chhatisgarh, Rajasthan aser Madhya Pradesh state tem nungang Congress sorkar lir. Northeast nung BJP tera junga yangogo aser tang parnoki south India nung aliba state tem nung rangloker. 2014 küm Lok Sabha election atema nüboyimba mapang nung BJP-i yimyimji “Tajung Anogotem” liasü iba dak alia Ato kilonser candidate, Narendra Modi-i BJP sorkar arura bendang linük balala nungi black money meyipa bener arua senso shia bank account nung sen lakh 15 inoktsütsü, linük nung küm shia mapa crore anana adokdaktsütsü nangzüka liasü, aser item tenangzükba nung ajemdaker parnoki takok tulu angu. Ajioda joko Centre sorkar kümsük abensatsü anogo züngdangteta dang lir, anungji tang mapang ya nüburtemi BJP-i nangzükbatem seret odanga asadangba mapang ka lir. Yimtenren party ajaki nüburtem dang jenti nangzüker, ajisüaka itemji mapa küma inyaker asü masü, ibaji tongtibang. Tang linük nung national party tulutibaji BJP lir, ano külen Congress-ibo kijai sorkar kümtettsüsa jenjang ka nung mali, ibayongji tang yimtenren tensa nung ajemdaker Congress lennir aser UPA Chairman, Sonia Gandhi-i lokteperbo kokdisü? ta bilema taruba küm Lok Sabha election nung BJP anema party tem lokteper tokteptsü atema yaküm opposition party 20 nungi lennirtem jaoka senden menogo aser tang Congress Tir, Rahul Gandhi-ia opposition party temi ayongba senden aika nung dena arudar.