Taküm ‘Aam Aadmi Clinic’ 1000 lapoktsü: Kejriwal

New Delhi, July 19 (Agencies): Deobar nü Delhi Chief Minister Arvind Kejriwal-i tang mezüng Delhi nung ‘Aam Aadmi Clinic’ lapoktsüogo, aser iba sentong nung jembidang pai, AAP sorkari taküm yimti nung item ama clinic 1000 lapoktsü, ta metetdaktsü.
“Yangi ( Aam Aadmi Clinic) sensakertemi teyari tajung angutsü. Iba ya tatishitsü agitsüsa clinic tajung lir aser taküm onoki ano clinic 1000 lapoksemtsü,” ta AAP tongti lenir aser CM Arvind Kejriwal-i ashi.
“Iba ya tepelatsü mapang ka lir. Iba clinic ya sen kanga ajema intoka yanglu, iba ya sen lakh 15-20 shi intoka yangluogo, tamalenbo dispensary ka yangluba nunga sen iba dak tema intoka liasü. Iba sorkar ya ochishir sorkar aser onok inyakyim nung ochimashi mali,” ta Chief minister-isa shisem.
Ano külen iba clinic nung inyaker ka tenüng agi Bhavna Sharma-i, iba clinic nung anguba teyaritem ajanga lisopur kanga tajangzük angutsü, ta ashi.
“Yangi (clinic) antibiotic, antacids, anti-diabetic ama mozü tapu aika angutsü. Iba clinic ya ajak asoshi lapokja lir, iba ya ajanga anasa aliba slum nung alirtem kanga ajangzüktsü,” ta laisa ashi.