Taküm Arishi

Tenük sakdang ya kechi? Ta süngmang.
O! Ya alimajia na ta kütsübok nung alidang,
Mezüngpuri jimbiba angashi.
Ali metongjungi ola tapu aika angashi;
Tenüngsang, tepela aser ajeba ola dena.
Kinü jakia jebmeso, saka kenpiga dang liasü.

Sowar ama menüa-jeba dang kenüwa sui.
Tebang lashia tetsüng tepen songla aküm.
Joko arishi südaker-süksen ama sui aor asünung,
Memeteti küm renloka aodang pela bilem.
Shisatsü nung mainji pei ajung asadang,
Anasa alir petsaprongdaktsü.

Temang atsüshia aindang süngmang,
Saka ya alimar yimya ta yimdangi aru.
Taküm nung tepela, jangratem aika ajangshi,
Saka teti asoshi jangratem mungutet.
Ajak nung toktepnüa aser inyakdangnüa ait,
Saka amajok nung tashi lulaba dang asü.

Tasoba küm agi nisung ka kümteta aküm.
Kiraka aliba metongshitsü tesülen reprangdang,
Ajisaka ibaji kenyongi tamakoktsü mapa liasü.
Joko tarutsü atema bilemdang ayibmajang;
Züshia maruaka temulongjang tipmetemdaktsü.
Nübu jungteterji kechisarena ajak nung atongsemtsüsa aküm.

Küm agi abensanung tarutsü asoshi lemang bushi.
Joko kibong kata kümteterji shisabulu agi asüng.
Temulong tipmatemyong kilung yangertsü asoshi ayameso;
Tzünglu, yipru tizüka tebo shiteper alar küma inyak.
Tarutsü asoshi bilemdang tokolokia mapa meinyak.
Khuret tali aruji akhümli nungi pila onü.

Atura mapang ta aikati ashiba angashi.
Temulong nung jenti bilemaka awa aotsü atsüayong.
Ola-osü melenshia akümji aika mulong yirudaktsü.
Arishi ano talang alitsü ama bilem,
Saka tenemser-metsü, lir-anüsü anasa liasü.
Aji saka ano asentenshir ken ayamesodang.

Joko akhümliri oko ta, asüri maruata züngshi.
Tetsüng asem tennür jajadang kinü shisatsü aden.
Tashi maka, tenüktelen mabensa akümji kecha nunga mezüngsem.
Teinyaktsü ajak agi semchirsemnur den kidangmonger aküm.
Yipden nung metadaker ita anogo süka lanuwa mapang
menungra aitdang,
Tsüa! Nisunger arishia yamai atsü nu ta akhümli suidaktsü.

– Sangro Mejimer – T. Lanu Jamir, Dimapur