Taküm Arjuna Award angutsü imlaa maliasü: Hima Das

New Delhi, Rongjui/September 19 (Agencies): India nunger nüngtugu asemteper Hima Das-i Sangtennü ashiba agi, lai international jenjang nung shilem tajung agiaka taküm Arjuna award angutsü imlaa maliasü.
Arishiküm 18 tain Assam nung asemteper ya Arjuna Award atema asayar 20 benokdangba nung densema lir, koba Sports Minister Rajyavardhan Singh Rathore-i asadanger agizüker.
“Ni taküm Arjuna award agizüktsü imlaa maliasü. Ni sangküm nungerang kü tenüng benoka asadangtsü akok ta bilem,” ta Das-i Adidas puri ayongba promotional event ka nung adendang ashi. Lai taküm Finland nung U-20 World Championship nung gold medal koktetogo.
Hima dang “Dhing Express” ta ajar aser lai taküm World Championship nung gold anguba den 18buba Asian Games nung gold ka aser silver ana koktetogo.
La kodang nungi training agi tenzüktsü, ta asüngdangba mapa lai, “season bo tembangogo. Taruba küm South Asian Games, Asian Championship aser World Championship asayatsü lir anungji training mapang ni asayamung balala atema renemtsü,” ta ashi.
Asemtepba ajak rongnung la atema koba jangratatemba liasü ta asüngdang dang lai ashiba agi, “Finland (World Junior Championship) nung asemtepba ya la asoshi jangratatemba liasü aser ano Asian Games nung tzünglu arua semifinal asemtepba-a lai kanga jangratema bilemteter.”
Hima-i secs 50.79 nung alizüng tongteta 400m race nung silver angu, koba la asoshi tang tashi nung tajungtiba lir. “Ni nükjidong kar lir aser ka khen ka khen ta inyakyonga aotsü. tangbo nüburtemi kü dak nungi aika imlar aser ni itemji ajangtettsü. Ni Asian Games nung 50.79 score asü anungji 50.78 atongtsü asoshi tama merangtsü,” ta lai ashi.